今日有報道話「曾蔭權涉貪 面臨刑事起訴」。文章話廉署調查煲呔曾涉貪案，經過逾兩年時間終進入尾聲，近日法律界及政界廣泛流傳，廉署發現有足夠證據起訴曾蔭權涉嫌公職人員行為失當，包括曾以低價租住香港數碼廣播（DBC）大股東黃楚標在深圳東海花園的6,000呎豪宅等。文章指律政司稱，正考慮相關資料，這意味曾蔭權或要面臨刑事檢控。
據Ariel所知，煲呔曾涉貪案當中比較有可能跟的只是租用黃楚標豪宅的一事，廉署查完交咗報告俾律政司，律政司就要睇吓夠唔夠料告，傳聞證據未係太夠硬，唔係咁似會告。
至於律政司發言人答嗰句，今日亦係同一口徑，話「正考慮前行政長官曾蔭權案件的相關資料」。呢句話只係中性，睇唔到有「意味曾蔭權或要面臨刑事檢控」的暗示。
聞說律政司正就此案，尋求獨立法律意見。律政司遇到呢啲敏感大案，通常會問外間大狀的意見，睇吓夠唔夠料告。好似許仕仁案，就係問咗一個本地資深大狀和一個英國御用大狀都話可以告，先至去馬。外間法律意見點講，有時都唔係百分百估到架。
Ariel
** 博客文章文責自負,不代表本公司立場 **
立法會創下歷史先河，第一次發生行政長官答問大會要腰斬，引發政壇炸彈，成為「花生友」又一大話題。
睇番個時間表，CY的答問大會應該到十點九，「拉布」三子去到最後半小時發難，搞吓搞吓，最後由大嚿「按劇本」掟出豆沙包，拉開大龍鳳序幕，曾主席決定趕三子離場，並暫時叫停會議，但繼續開會後長毛唔肯走，何秀蘭又發難，不滿主席的裁決，講到好勞氣吓，曾主席見咁的情況，就宣布休會算喇。計計吓，離原定結束時間都唔係差得太遠。就係咁齊齊創咗呢次有史以第一次腰斬答問大會的紀錄。
不過，場大龍鳳就未完，CY離開議事廳後，即刻喺外面的咪兜(記者的收音話筒)前，狠批議員破壞綱紀，促請立法會嚴肅處理，睇電視直播的畫面，局長們一臉嚴肅齊齊企喺CY後面撐場，都可見政府真係覺得事態嚴重。期間拉布三子繼續喺附近高聲抗議，聽得記者好辛苦先聽到CY講嘢。
跟住到建制派議員在民建聯譚Sir領軍下去到咪兜前一齊轟拉布三子阻咗佢哋時間發問，坐喺長毛隔離的馬逢國仲主動做埋「證人」，話聽到長毛叫「郁佢」，相信佢係掟「豆沙包襲擊案」的主謀，之後工聯會、經民聯輪發言。
咁仲未完，少有喺立法會發聲的行政會議召集人林煥光都出場，佢語氣溫和啲，但就係劍指議員要合理文明，又叫立法會考慮辯論議事程序。
建制派連番出招後，到長毛、大嚿、慢咇等人出場回擊，批番CY態度囂張，言詞充滿挑釁性，長毛就直接啲，承認係「想郁佢」，但自己無做錯。之後又到一班溫和泛民的立法會議員代表表態，都係齊鬧CY打擊「佔領中環」運動，恐嚇市民云云。
好喇，當然係唔少得，係「難為了家嫂」的曾主席出場解畫。
今日最忙都算係立法會的咪兜，呢場大龍鳳到底雙方有預謀定冇預謀呢，講真，激進議員掟吓嘢預咗，CY心戰室都預咗要回應，之但係搞腰斬，就似超出預計，可以話係無預謀但各自有劇本的大龍鳳啩。
