咪誤會追星可唔做陪審員

前政務司司長許仕仁涉貪案，高院昨日選九人陪審團，不少人扭盡六壬申請豁免，成為報章頭條，有法律界人士睇完報紙同Ariel講，普通市民好易誤會去韓國追星可以拒絕當陪審員，其實完全唔係呢一回事。

佢話通常都係上到高院的刑事案才有陪審團(少數民事案如誹謗案係例外都可以有陪審團)，幫法庭判定事實，至於法律問題以及量刑就由法官去判。

法院先會抽一班可能做呢次陪審的人上庭，佢地自己可以提理由申請豁免，與訟雙方可以反對個別人士出任，每一方都可以不用講理由反對六次，用夠反對就要有理由才可反對，睇法庭接唔接受。

昨日搵咗39個可能做陪審員的人上庭，通常見到呢啲要審幾個月的案係人都怕怕，最多人提的理由係去韓國外遊，搞到主審法官麥機都講笑話：「看來要將法庭移師往韓國。」

不過實際上呢啲外遊豁免申請法庭一般都唔批，昨日只有一個獲批，一個中年女士話睇咗《來自星星的你》要去韓國追「handsome man from the star」(來自星星的俊男)，之後又要去日本旅行，由於買的是團體票，若她未能成行，會令同行的七名友人全部無得去，結果獲得法官豁免。

相信係呢一個「團體票」的理由打動了法官，唔想佢損失過大。法律界人士話呢個係例外，唔係典型，大家唔好誤會，萬一抽中上庭亦千萬不要講大話，否則被拆穿要坐監。

如果上述是幸運者，就有個不幸者，有個做地產經紀的男士用廣東話向外籍法官麥機智表示其英文程度不足以理解案件，法官即以半鹹不淡廣東話回應：「唔緊要just speak in Chinese」，該男士又稱法官剛才的簡介，他只明白三至四成。

麥機智法官很不情願地批准他豁免，但卻將其名字列入中文審訊的陪審員候選名單中，指未來有一宗歷時六個月的中文審訊商業刑事案會抽選陪審員。吓，六個月咪仲大鑊？

Ariel

** 博客文章文責自負,不代表本公司立場 **

特首CY昨日在策發會主動諮詢委員意見，問如果削20%自由行旅客大家點睇，又問吓有何方法削減自由行?

CY咁問法，食自由行飯的委員自然彈起，包括擁有海港城和時代廣場的九倉主席吳光正，以及和吳光正友好的自由黨議員方剛等，他們反對理由包括不少商舖已簽咗租約，自由行政策變化打擊旅遊業等等。

香港近年興起反內地旅客的浪潮，出現指罵內地旅客的事件，內地民間漸生反對香港的情緒，部份部門亦有一種睇法，認為自由行係益香港的政策，但既然香港人反對，何不減縮自由行。特首CY就唔係咁想減自由行喇，怕減得太勁會打擊本地經濟，影響就業。

CY在策發會講減20%自由行，睇嚟並唔似係一個成形政策，更似係一個氣球，放出來睇大家反應。

政府高官有一種情緒，認為好多政策商界大受其惠，但人家批評時，商界及他們支持的政黨一句聲都唔出，等政府去受靶。商界政客平時專做好人，只有反政府時才會出聲攞分。咁政府都唔好咁笨啦，好似自由行咁，講明研究減少，商界唔同意，你咪出來反對做吓醜人囉。若香港反對削減自由行聲音大，又可以反過來遊說阿爺唔好減，或者唔好減咁多囉。