婚禮對話知情版本

今早起身買本《東周刊》睇，睇到一段嘢好趣，上期《壹週刊》發咗段海外婚禮趣聞，今期《東周》發炮反轟。

 

《東周》話，上期《壹週刊》中環人語講咗一段海外婚禮嘅八卦料，話新郎哥父親喺席上的一段對話，《東周》指有去過呢場婚禮人士話，現場親耳聽到新老爺現場的講法其實係咁:「一對後生仔女由拍拖到結婚，出面一定好多閒言閒語。第一件事，話個仔離過婚，又話佢有好多女朋友，跟住又唱個女仔以前好多男朋友。我想問吓那些八婆，一個又靚、讀書又叻嘅單身女仔，好多男仔追係正常架？我個仔都係單身，一樣讀到書，有女朋友都係正常架？關你班八婆咩事？我又想問你哋，你地嘅女係咪仲係處女？

「第二件事，佢地初初拍拖時，我送咗兩個手袋俾未來新抱做見面禮，啲八婆今次竟然話我，送手袋送到好似追女仔咁。我聽到後條氣唔順，跟住送咗好多手袋俾未來新抱嚟刺激佢哋，等佢地恨吓，所以未來新抱應該多謝佢地。我想講，追女仔使乜送野架？追到先算，追唔到就送，咪連deposit都蝕埋？」

《東周》又講，關於呢啲婚禮的閒言閒語，知情人士話現場好多人覺得啲八婆好無聊，其中一位「鹽先生」就話：「啲八婆食飽飯無嘢做，唔使啋佢哋。」 至於點解外面傳到錯晒，知情人士話，可能婚宴場地個咪唔夠大聲，有啲人又坐得太後，聽唔清楚以訛傳訛，同壹仔亂咁講。

近排中環有唔少人講起呢單嘢，今次《東周》出呢個「知情版本」，都算係權威消息囉。

Ariel

** 博客文章文責自負,不代表本公司立場 **

前政務司司長許仕仁涉貪案，高院昨日選九人陪審團，不少人扭盡六壬申請豁免，成為報章頭條，有法律界人士睇完報紙同Ariel講，普通市民好易誤會去韓國追星可以拒絕當陪審員，其實完全唔係呢一回事。

佢話通常都係上到高院的刑事案才有陪審團(少數民事案如誹謗案係例外都可以有陪審團)，幫法庭判定事實，至於法律問題以及量刑就由法官去判。

法院先會抽一班可能做呢次陪審的人上庭，佢地自己可以提理由申請豁免，與訟雙方可以反對個別人士出任，每一方都可以不用講理由反對六次，用夠反對就要有理由才可反對，睇法庭接唔接受。

昨日搵咗39個可能做陪審員的人上庭，通常見到呢啲要審幾個月的案係人都怕怕，最多人提的理由係去韓國外遊，搞到主審法官麥機都講笑話：「看來要將法庭移師往韓國。」

不過實際上呢啲外遊豁免申請法庭一般都唔批，昨日只有一個獲批，一個中年女士話睇咗《來自星星的你》要去韓國追「handsome man from the star」(來自星星的俊男)，之後又要去日本旅行，由於買的是團體票，若她未能成行，會令同行的七名友人全部無得去，結果獲得法官豁免。

相信係呢一個「團體票」的理由打動了法官，唔想佢損失過大。法律界人士話呢個係例外，唔係典型，大家唔好誤會，萬一抽中上庭亦千萬不要講大話，否則被拆穿要坐監。

如果上述是幸運者，就有個不幸者，有個做地產經紀的男士用廣東話向外籍法官麥機智表示其英文程度不足以理解案件，法官即以半鹹不淡廣東話回應：「唔緊要just speak in Chinese」，該男士又稱法官剛才的簡介，他只明白三至四成。

麥機智法官很不情願地批准他豁免，但卻將其名字列入中文審訊的陪審員候選名單中，指未來有一宗歷時六個月的中文審訊商業刑事案會抽選陪審員。吓，六個月咪仲大鑊？