長實賣樓阻滯多

長實推荃灣環宇海灣新盤，四日收票9300張，超額認購25倍，勁過恆基馬鞍山迎海．星灣的8300票，成為一手新例後的「新票王」。長實威威，但即刻惹起「一手住宅物業銷售監管局」的密切注意，懷疑當中有否「發水」問題，當局指長實可能透過某些入票規則及安排，令到入票票數，比實際買樓的人數高，要求地產代理監管局徹查。

聞說當局手頭上並無實質證據釘到長實。不過，有趣嘅係，監管局話要查長實，收票量即刻由每日平均2300張，跌至大約1000張。

有地產界高人話，現時長實賣環宇被質疑有無一人入多票或地產代埋代入票的問題，在所有新盤都存在，但唔知點解就係高調查環宇海灣。估計有兩個可能，第一個可能是環宇收9000幾張票好多(同佢第一浸推出單位數目多亦有關)，入飛多令佢成為眾矢之的。第二個可能係政府卡長實都卡得幾緊。

呢個地產界高人留意到，唔少發展商都係買超遠期樓花，但睇環宇海灣，連棚架都已經拆埋，同賣現樓差唔多。長實呢個盤在去年在樓市最後一浸嘅賣樓熱潮之前，已經遞了申請，搞來搞去都搞唔掂。行家賣完樓，長實都未攞到入伙紙，結果樓市變冷，佢趕唔切推出。

到呢一輪政府在雙倍印花稅樓換樓上稍作讓步，市場氣氛好轉，以為佢可以食到頭啖湯，結果又搞出個入票發水風波。所以有口水佬話政府在雙倍印花稅上讓步係幫長實賣樓，真係捉錯用神啦。

Ariel

** 博客文章文責自負,不代表本公司立場 **

特首CY話要削20%自由行，搞到商界牙痛咁聲。Ariel昨日遇到一個大集團老細，佢係咁問Ariel知唔知特首搞乜嘢，話而家旅客生意本來已開始轉差，若削自由行經濟實唔掂咁話。

商界眾口一詞，但政界好多猜測，泛民一族話CY係唔係用削自由行嚇佔中？不過Ariel同高人傾一傾，佢認為呢啲講法有啲九唔搭八，佢問乜佔中班人會關心零售關心經濟嗎？若然佢地根本唔關心，咁削自由行佔中派又點會驚呢？ 當然，佔中一搞大，唔止自由行，好似曼谷咁，其他遊客都唔敢來，但就同而家話削自由行扯唔上關係。

高人話係人都知唔少市民反對太多大陸遊客來港，咁CY打開口牌話削自由行，斷估可以攞吓分啩。

諗落又係，過去政府愛自由行愛到不得了。政府亦朝住繼續開放大陸旅客入境的方向盲目飛行，商務及經濟局蘇局長搞出將來可能有1年有1億大陸旅客訪港的預測。聞說呢個1億數字出街時，CY頭都痛埋，問點解咁無政治常識講呢啲嘢?

如今要剎車就由CY自己操刀，講到削20%咁多，講到商界媽媽聲，都有益於特首民望喎。