法院爭位爆晒粗

許仕仁案全城哄動，除咗牽涉人物多，就連選陪審團都新聞多多，各大傳媒自然派重兵採訪，點知引發出一場法庭座位爭奪戰，仲爆晒粗。

案件審訊未正式開始，Ariel八到過去幾日，喺高院外面已經舌劍唇槍，據聞有記者為咗「爭奪」法庭內僅有的19位各施各法。

司法機構新聞組每朝八點九派貼紙，攞到貼紙先入得去聽，有記者自製登記表，貼咗喺法院外面，等記者自行簽到，到夠鐘就有人將張登記表送上去，新聞官會問在場行家有無異議，無嘅話就跟住嚟派貼紙。

據講原本相安無事，但近幾日開始有人不滿，投訴張登記表唔係官方表格，點解要跟？又有人自己做埋新聞官走去點名，見人哋行開咗，就即刻劃走個名，等自己排前啲，咁其他人返嚟見到自然嬲爆，爭拗由此起。據講現場鬧得好火爆，粗口橫飛之外，更有人更揚言要去新聞處同記協投訴添！

有法庭中人同Ariel說，呢個運作方式用咗好耐，做開法庭的記者都知道，但今次引起是非多多就估唔到，新聞主任亦左右做人難。有法庭記者講笑咁話，遲早可能出現請排隊黨。

司法機構中午出咗張新通告，下星期三起提早七點九派貼紙，時間同之前處理「小甜甜」龔如心遺產案一樣，據講唔會再依照任何登記表派貼紙，換句話說咪即係要記者喺晒高院門外排隊，一到七點九開門就齊齊衝上去，睇吓邊個跑得快？好世界？

法庭中人話睇到咁都擰晒頭，總之希望唔會有肢體衝突。加上天氣開始熱，希望唔好進一步刺激到大家人都變躁啦。

Ariel

** 博客文章文責自負,不代表本公司立場 **

CY出招抛出研究減自由行繼續引發政壇花生友各自表述、各自演繹，外界關心政府會否大刀斬自由行。

有政府中人同Ariel講，政府調整自由行政策，其實都要好小心，皆因點做都可能釋出負面信息。問題唔係削減幾多嘅問題，減20%又好，減10%又好，就算係減1%，都有機會令人覺得香港唔歡迎內地旅客，搞唔好互相排斥的心理可能仲深添。如果處理不當，會造成好大的衝擊。

政壇高人就分析政府出手都應該計過條數，市民對旅客太多引致的各種現象，怨氣真係愈來愈大，但香港係一個自由經濟，商人要賺到盡，自由行客聚集嘅旺區，全部變成名牌時裝、名錶及化妝品的專賣區，將市民日常生活所需的店鋪通通趕走，旅客擠逼亦都對市民造成生活困擾，呢啲不滿都會算到政府頭上，問題係政府又唔可以叫啲商家點做。

成件事就變成，自由行帶來經濟收益，但亦付出咗社會成本，由市民同政府受，商家就好似只享受到成果，責任就唔使點孭。所以政府今次出招，變相係要商界孭番啲社會成本，要出吓聲保住自己隻飯碗囉。