佔中公布下月搞全民投票，投票市民會面對兩個題目，除咗要喺早前選出的三個方案中，揀一個或棄權外，仲加咗一條問題︰「如果政府方案不符國際標準讓市民有真正選擇，立法會應予否決」。
原本講明只係幾個方案「三揀一」，點知又搞多條問題出嚟，全因在上次投票日被激進派偷襲，將所有溫和派的方案踼走晒，引發好多溫和泛民支持者不滿，仲聲言唔去投票。
陳日君樞機同泛民元老李柱銘見勢色唔對，早前就呼籲，市民唔應該再糾纏於那三個方案講咩，總之要出嚟投票表表態，投票就係支持普選話。呢句說話聽落好反智，明明全民投票係要選一個方案出嚟，又叫大家唔駛理方案講咩，咁究竟點投先好呢？呢啲講法只講遠大理想，不理程序公義，真係似共產主義，多過似西方民主理念。
聞說當事人腳仔都軟，怕呢啲叫人「盲投」的說法無說服力，就再諗辦法應付，若加條問題落去，怕會令件事複雜咗，但唔搞咩，又驚溫和的人杯葛投票就仲大件事，最後仍急急腳傾加返條問題落去，希望推返高個投票率，但成個投票真係搞到有啲亂。
政府中人就當睇戲咁睇，相信622投票率唔會太高，但佢哋一啲都無高興，因為相信不論呢次投票搞成點，呢架「佔中號」列車都唔會停，會繼續衝落去，正如佔中發起人之一陳健民話齋，投票人數少於十萬，都唔等於會取消佔中。所以政府已經預咗，嚟緊要同佔中打連場大仗喇！
Ariel
** 博客文章文責自負,不代表本公司立場 **
許仕仁案全城哄動，除咗牽涉人物多，就連選陪審團都新聞多多，各大傳媒自然派重兵採訪，點知引發出一場法庭座位爭奪戰，仲爆晒粗。
案件審訊未正式開始，Ariel八到過去幾日，喺高院外面已經舌劍唇槍，據聞有記者為咗「爭奪」法庭內僅有的19位各施各法。
司法機構新聞組每朝八點九派貼紙，攞到貼紙先入得去聽，有記者自製登記表，貼咗喺法院外面，等記者自行簽到，到夠鐘就有人將張登記表送上去，新聞官會問在場行家有無異議，無嘅話就跟住嚟派貼紙。
據講原本相安無事，但近幾日開始有人不滿，投訴張登記表唔係官方表格，點解要跟？又有人自己做埋新聞官走去點名，見人哋行開咗，就即刻劃走個名，等自己排前啲，咁其他人返嚟見到自然嬲爆，爭拗由此起。據講現場鬧得好火爆，粗口橫飛之外，更有人更揚言要去新聞處同記協投訴添！
有法庭中人同Ariel說，呢個運作方式用咗好耐，做開法庭的記者都知道，但今次引起是非多多就估唔到，新聞主任亦左右做人難。有法庭記者講笑咁話，遲早可能出現請排隊黨。
司法機構中午出咗張新通告，下星期三起提早七點九派貼紙，時間同之前處理「小甜甜」龔如心遺產案一樣，據講唔會再依照任何登記表派貼紙，換句話說咪即係要記者喺晒高院門外排隊，一到七點九開門就齊齊衝上去，睇吓邊個跑得快？好世界？
法庭中人話睇到咁都擰晒頭，總之希望唔會有肢體衝突。加上天氣開始熱，希望唔好進一步刺激到大家人都變躁啦。
