民主黨主席劉慧卿，上星期五單拖去政府總部，見政務司司長林鄭月娥同譚志源，原來喺同一日，泛民幾名議員走咗去同英國駐港總領事吳若蘭食早餐。
當日有份食早餐嘅包括民主黨單仲偕、公民黨梁家傑、湯家驊，同埋公共專業聯盟莫乃光、梁繼昌，不過第二日報紙無咩大篇幅報道，好多人以為佢哋只係飲吓咖啡，吹吹水，但知情人士提醒Ariel，呢頓早餐「有料到」。
話說吳若蘭叫泛民議喺政改問題上，多啲關注吓提名委員會的組成方法，咁就不禁令人想起，係咪有人想向呢班議員教路，叫佢哋唔好再喺一啲不著邊際的問題上糾纏？
泛民中人一直堅持「公民提名」，中央同特區政府已多次表明不符合基本法同人大常委會決定。英國同中國打交道咁耐，深諳同中國鬥法的方法，即使反斗如前港督「肥彭」彭定康，呢位末代港督當年改革立法局選舉制度，都唔係話唔理基本法全面搞直選，而係揸住你本基本法嚟玩，你有功能組別，佢就搞新增九個功能組別議席（即係「新九組」），但一招移形換影，令功能組別選民人數由六萬幾人，大幅加大到超過一百一十萬，幾乎囊括全港打工仔女，實情係變相直選。
今次吳若蘭提提多啲注意提委會組成，似乎亦係同一思路，提吓班議員與其要反轉基本法，不如順住基本法諗吓有乜空子可鑽，點樣喺現有遊戲規則內玩，搞到提委會變相由直選產生，好過走出界外，玩啲無結果的政治遊戲。都唔好話英國人唔高章。
有建制派中人聽到呢場早餐會唔多喜歡，話中聯辦約見泛民，佢哋諸多藉口扭計唔肯去西環，但吳若蘭一請食早餐就去。
不過睇返呢排民主黨都好慘，俾激進民主派狙擊，所以唔係咁敢見阿爺。但佢地似乎都怕見英國總領事有反彈，所以都係寧願高調見林鄭，低調見吳若蘭。
Ariel
** 博客文章文責自負,不代表本公司立場 **
