政事
通訊事務管理局今日刊登公告，邀請公眾人士就香港電視網絡有限公司的本地免費電視節目服務牌照申請發表意見。消息一出，好多人都覺得港視今次有望攞牌，掃入港視股票，搞到佢股價急升6.5%。
不過Ariel索吓料，發覺又唔係嗰回事。港視上次申請攞牌被行政會議拒絶，今次修改方案再嚟。上次港視建議首三年投資超過10億，搞30條頻道，被質疑佢夠唔夠資源去搞。今次佢改為頭6年投資34億，搞3條頻道，再入建議。
按通訊局的理解，以網絡經營的免費電視，發牌數目不限，時間不限，所以佢收到申請，就機械式咁進入程序，先諮詢公眾，然後就提建議俾行政會議，由行政會議拍板。
行政會議上次決定只發兩個牌兼唔俾港視，今次即使通訊局再建議發牌俾港視，都睇唔到行政會議會改變主意喎。所以今天追入港視股票的股民，執生啦。
Ariel
** 博客文章文責自負,不代表本公司立場 **
而家佔中三子未有計劃在今年7.1搞佔中，話要等政府方案出來睇睇先算，只有較激進的泛民組織成日話要7.1預演佔中，但學聯的動向值得關注，佢地話若在6.22全民投票後，政府仍拒絕聽民意否決公民提名，學聯將與在6.22至7.1期間發動提早佔中。
學聯秘書長周永康昨日話，六四維園有18萬點燭光，話俾中央政府聽香港人對民主訴求已忍無可忍，若然政府繼續對市民公民提名訴求充耳不聞，學聯係必定會佔中，會透過公民抗命的行動，話俾呢個政府聽，你已經無法管治。
學聯話佔中時間介乎6.22全民投票後至7.1期間，預計有近千人參與。周永康話為免警方打壓，暫時不會公開具體地點，「政總、立法會、中聯辦，甚至馬路，我哋都會考慮」。
一直以來，佔中三子都未具體行動，話要等政府方案出來。知情人士話，佢地見政府未揭底牌，市民反對氣氛未夠濃，怕太早發動佔中，參與人數唔多無氣勢無影響。
但學生就好唔耐煩，覺得班學者太雞，認為人地台灣太陽花運動都搞完返埋屋企，香港仲得過講字，所以躍躍欲試。今次學聯講到咁具體，搶繮搞佔中，睇嚟本月下旬都要開一開波囉。
