悲情牌

過完六四，未到七一，先有一個6．22全民投票的政壇焦點事件，之前因為激進泛民「偷襲」成功，踢走咗溫和泛民的所有普選方案，令到溫和同激進泛民之間有啲燶味。

泛民元老可能擔心因為分歧影響投票率，出力催谷。陳日君樞機等人喺6月14日準備搞個「毅行爭普選」活動，搞足七日，到投票前結束，毅行名符其實就七日中行足84小時，穿梭港九新界大街小巷呼籲市民出來投票。

大熱天時，加上陳樞機年過80，都咪話嘢小，成個活動，充滿悲情味。

政壇高人同Ariel講，今次佔中投票日，搞到俾人有啲唔知想點的感覺，唔太似會出現「激動人心的結果」，唯一唔可以預料的係，對方會否打悲情牌，所謂政治策略可能變出好多不同的結局。

假設出現投票熱烈的情況，到底泛民一邊係用激進啲方法，利用民意同政府打場硬碰硬，還是作為籌碼逼政府同阿爺作出讓步呢？政府表面冇特別招數去拆，但都有評估各種可能的情況以應對。聽落兩邊都嚴陣以待喎。

Ariel

** 博客文章文責自負,不代表本公司立場 **

通訊事務管理局今日刊登公告，邀請公眾人士就香港電視網絡有限公司的本地免費電視節目服務牌照申請發表意見。消息一出，好多人都覺得港視今次有望攞牌，掃入港視股票，搞到佢股價急升6.5%。

不過Ariel索吓料，發覺又唔係嗰回事。港視上次申請攞牌被行政會議拒絶，今次修改方案再嚟。上次港視建議首三年投資超過10億，搞30條頻道，被質疑佢夠唔夠資源去搞。今次佢改為頭6年投資34億，搞3條頻道，再入建議。

按通訊局的理解，以網絡經營的免費電視，發牌數目不限，時間不限，所以佢收到申請，就機械式咁進入程序，先諮詢公眾，然後就提建議俾行政會議，由行政會議拍板。

行政會議上次決定只發兩個牌兼唔俾港視，今次即使通訊局再建議發牌俾港視，都睇唔到行政會議會改變主意喎。所以今天追入港視股票的股民，執生啦。