政事
環境局就不同發電方案諮詢，之前唔聲唔聲，後來俾人隊內地買電方案隊得多，局長黃錦星近日出來講吓，強調內地聯網電力供應穩定，又話香港10年後用電僅佔南方電網2%，內地可以保證到供俾香港的電力咁話。
點知話口未完，由南方電網供電的東莞昨日大停電，認真倒米。今次停電範圍甚廣，包括厚街、虎門、東城、鳳崗，大批工廠、學校停電幾個鐘，搞到港商生產大混亂。大停電今年亦唔係第一次，4月時東莞亦曾大停電。港商質疑內地停電無交代。
港商媽開順手講埋香港同內地買電的問題，話即使南方電網優先供電俾香港，確保大陸停電香港都唔使停，但停電地區的大陸市民一定會破口大罵，令中港關係更差。
Ariel 就覺得同大陸買電在穩定性問題好難拗，政府唯一可以拗係打破壟斷，抑制電費上升，但係唔係幾明政府點解唔敢大力講呢個觀點呢?
Ariel
** 博客文章文責自負,不代表本公司立場 **
過完六四，未到七一，先有一個6．22全民投票的政壇焦點事件，之前因為激進泛民「偷襲」成功，踢走咗溫和泛民的所有普選方案，令到溫和同激進泛民之間有啲燶味。
泛民元老可能擔心因為分歧影響投票率，出力催谷。陳日君樞機等人喺6月14日準備搞個「毅行爭普選」活動，搞足七日，到投票前結束，毅行名符其實就七日中行足84小時，穿梭港九新界大街小巷呼籲市民出來投票。
大熱天時，加上陳樞機年過80，都咪話嘢小，成個活動，充滿悲情味。
政壇高人同Ariel講，今次佔中投票日，搞到俾人有啲唔知想點的感覺，唔太似會出現「激動人心的結果」，唯一唔可以預料的係，對方會否打悲情牌，所謂政治策略可能變出好多不同的結局。
假設出現投票熱烈的情況，到底泛民一邊係用激進啲方法，利用民意同政府打場硬碰硬，還是作為籌碼逼政府同阿爺作出讓步呢？政府表面冇特別招數去拆，但都有評估各種可能的情況以應對。聽落兩邊都嚴陣以待喎。
