小一派位結果上周六公布，今年添加一樣有特色的怨言，就係跨境學童家長對子女派往北區以外學校的不滿。有受訪雙非家長反問記者：屯門喺邊度？因為兒子派去屯門，佢唔知喺邊，成為一個話題。昨日有代表跨境學童組織，投訴新設的「跨境學童專用校網」，將跨境學童派往北區以外學校，對他們不公平，如果政府不回應，可能會訴諸法律。
香港政府做事，往往見步行步，去年見到本地家長嘈得緊要，話跨區學童佔晒學位，今年就搞個專為跨境學童而設的「跨境學童校網」，實際上係將大量跨境學童分流去其他地區。本來，從政策合理性考慮，優先讓本地學童原區就讀，而新移民學童要辛苦一些，要到其他地區上學，屬合理安排。海外好多國家，對新移民子女的就學安排，甚至學費安排，都可以有所不同。
可惜的是，香港是一個講究權益的社會，好多人事無大小，也會提出司法覆核。內地人當然唔笨，見到香港政府這樣安排，對其子女不利，已聲稱會採取法律行動，估計出現司法覆核機會都唔細。
Ariel向政府中人索吓料，覺得佢地有少少支吾以對，好似對「本地學童優先原區就讀」的處理，能否挨得過法庭審核，唔係有十足信心。司法覆核是看看該政策有否違反自然公義，如果政策有立法會立法支持，情況可能會好點，若沒有立法支持，只是政府一個政策，上法庭結果如何是未知數。
有議員就話，過去好多人喜歡玩司法覆核，如今內地人開始識玩，怕香港司法覆核咬番自己，過去未住滿七年可領綜援的官司已經有先例啦。
Ariel
** 博客文章文責自負,不代表本公司立場 **
今日兩大左報《大公》同《文匯》，都頭版報道佔中運動「借殼」收取「來歷不明巨額捐款」。報道話「佔中」申請成立有限公司不果，透過香港民主發展網絡帳戶收捐款。《大公》仲話，「佔中」舊年已用「民主發展網絡」銀行戶口「非法募集捐款」。
「佔中」三子陳健民回應話，有喺網頁講明，借用香港民主發展網絡帳戶收受捐款，又話民主發展網絡執委會同意借出戶口，錢銀交收都有會計師核實。
Ariel同法律界人士傾過，佢話唔講政治只談法律，照牌面睇，「佔中」有犯法嫌疑，因為佢哋成立公司被拒後，唔可以用其他公司名義籌款，雖然「佔中」打正公民抗命的口號，都無必要提早犯法呀。
法律界人士話「佔中」如果要用籌款支持活動，其實可以搞個活動，再搵人直接贊助活動支出，由捐款人直接找數就冇問題，但借民主發展網絡個名嚟收捐款，就唔多妥當啦！
依家咁做衍生兩個問題，一是市民捐錢時，雖然係想捐俾「佔中」，但啲錢就去咗民主發展網絡個戶口，「佔中」同民主發展網絡涉嫌非法籌款及協助非法籌款。二係民主發展網絡本身係經警務處批准成立的社團，本身無需報稅及繳稅，但問題係它代其他人去籌款，代付支出，有可能被稅局質疑唔係進行社團本身的活動，咁就唔一定可獲豁免，要交足稅啦(按道理佔中運動不能註冊成為公司，亦不會獲批准為註冊社團，佔中所籌得的收入，自然都不會獲稅務豁免)。從有效運用資源的角度睇，今次咁搞真係有好大問題。
Ariel睇完都覺得奇怪，尤其今次「佔中」有法律學者參加，事先睇唔到問題，行動未開始就不必要地犯法兼浪費資源，有啲漏招喎！
