政事
國務院新聞辦公室發表二萬三千字的《一國兩制在香港特別行政區的實踐》白皮書，政界普遍有「阿爺出招了」的感覺，而泛民中人就認為，阿爺係用白皮書打擊6.22公投。
不過Ariel索吓料，發覺白皮書唔係咁即興的作品，一份二萬三千字的文件，又真係唔可以話寫就寫。原來份嘢已經籌備咗成年，港澳辦副主任徐澤係幕後大腦，港澳辦為咗查證背後資料，仲搞咗幾次坐談會，搵番啲退咗休的前輩同學者，講番設計香港一國兩制的背景。當然初稿出來後，仲經過無數次修改，才得出今天的版本。
阿爺當然係用白皮書來作為治港理念的系統論述，同佔中運動打對台，但就唔係只為打6.22公投而作。有消息話份嘢本來在5月下旬已經搞掂，但係押後咗少少推出，就係為咗避開6.4呢個日子，等6.4後先至推。
至於份白皮書內容，除了反佔中外，亦反對外國勢力干預香港，同埋反對炒得幾熱的本土主義，顯示阿爺都唔怕和不同勢力過吓招喎。
Ariel
** 博客文章文責自負,不代表本公司立場 **
小一派位結果上周六公布，今年添加一樣有特色的怨言，就係跨境學童家長對子女派往北區以外學校的不滿。有受訪雙非家長反問記者：屯門喺邊度？因為兒子派去屯門，佢唔知喺邊，成為一個話題。昨日有代表跨境學童組織，投訴新設的「跨境學童專用校網」，將跨境學童派往北區以外學校，對他們不公平，如果政府不回應，可能會訴諸法律。
香港政府做事，往往見步行步，去年見到本地家長嘈得緊要，話跨區學童佔晒學位，今年就搞個專為跨境學童而設的「跨境學童校網」，實際上係將大量跨境學童分流去其他地區。本來，從政策合理性考慮，優先讓本地學童原區就讀，而新移民學童要辛苦一些，要到其他地區上學，屬合理安排。海外好多國家，對新移民子女的就學安排，甚至學費安排，都可以有所不同。
可惜的是，香港是一個講究權益的社會，好多人事無大小，也會提出司法覆核。內地人當然唔笨，見到香港政府這樣安排，對其子女不利，已聲稱會採取法律行動，估計出現司法覆核機會都唔細。
Ariel向政府中人索吓料，覺得佢地有少少支吾以對，好似對「本地學童優先原區就讀」的處理，能否挨得過法庭審核，唔係有十足信心。司法覆核是看看該政策有否違反自然公義，如果政策有立法會立法支持，情況可能會好點，若沒有立法支持，只是政府一個政策，上法庭結果如何是未知數。
有議員就話，過去好多人喜歡玩司法覆核，如今內地人開始識玩，怕香港司法覆核咬番自己，過去未住滿七年可領綜援的官司已經有先例啦。
