政事
阿爺的二萬三千字白皮書發表咗一日，議論仍然不絕。有人話佢無新意，只係將啲舊嘢炒埋一碟，可以不理咁話。
Ariel同知情人士傾過，佢話唔可以講中央對香港政策變咗，因為白皮書講的原則一早存在，但一些表述的確係新提法，除咗好多人都留意到的「全面管治權」之外，其他例如話香港的高度自治具有「監督權力」，仲有一句話對特區政府「作出新授權的權力」，都係新提法。
知情人士話，當香港有些人將高度自治講成「完全自治」，阿爺就從另一方面講，我俾你的權我會監督住你使用，可以對你作出新授權，也可以收番以往作出的授權，試圖扭轉有些人當香港自治係無限制的想法。
阿爺確立呢啲睇法之後，潛台詞就係如果你玩得過份，我隨時可以出手過問，你到時唔好話我干預，我有權咁做。結論係阿爺都相當硬架。
Ariel
** 博客文章文責自負,不代表本公司立場 **
運輸及房屋局局長張炳良早排火燒身，海陸空中晒，先有南丫海難調查報告收唔到科，再有高鐵延誤大劑嘢，然後新機場第三跑道又開始被狙擊，民望自然大插水。跟手地鐵加完價又到九巴加價，呢啲加價嘢無市民歡迎，自然衰氣撲埋身。
不過佢終於有番啲運啦，就係九巴加價時遇上阿爺公布佢套氣勢磅礡的白皮書，遇到大片上映，九巴加價呢的三線劇自然要行埋一邊，張張報紙頭版都上大片，九巴加價唔係咁talk，炳良局長的壓力自然減少。
Ariel問官府中人，九巴加價藏身白皮書之後，係唔係公關佈局? 佢笑笑口話運氣啫運氣啫。無論如何，炳良局長黑咗咁耐，上天好公平，有番啲好運降臨佢身上都應該。 講開又講，睇報紙話炳良昨日見記者時咁講:加幅低於九巴申請幅度，認為乘客可以接受。
Ariel睇完隻眼突咗一突，唔知記者有無引錯佢，若然佢真係咁講，又何以見得「乘客可以接受」。現今社會市民要求好高，不止加價呢啲衰嘢無乜情況下可以接受，即使係好嘢認為唔夠都唔係幾接受，所以後就唔講呢啲話啦，棧俾人鬧架咋。
