英美商會缺席表態聲明

香港總商會聯同四個商會在報紙登聲明反「佔中」，算係近期商界最高的表態，隨著6‧22投票日近，又有團體話要模擬佔中，阿爺又發功，發表一國兩制白皮書，政治氣氛好似愈來愈緊張。

商家一向都表現得同政治行得遠啲好啲，今次總商會高調表態，話對「佔領中環」行動表達關切，商界雖無意干預關於普選的討論，但就認為當政治行動妨礙恆常商業活動，影響本地中小企生計時，商界不能也不應坐視不理。睇嚟今次場交唔係一般的小打小鬧，各界別都好難話唔關自己事，唔發聲唔表態。

睇番成份聲明，參與除了香港總商會，仲有香港巴林商會、香港加拿大商會、香港印度商會及香港及澳門意大利商會，但就唔覺有好多利益、又幾活躍的香港美國商會同香港英國商會喔，照計商會之間都有傾吓登聲明的行動，英、美商會冇理由唔知架，今次唔參與係唔想表態？定係已經係一種表態呢？

Ariel

** 博客文章文責自負,不代表本公司立場 **

阿爺的二萬三千字白皮書發表咗一日，議論仍然不絕。有人話佢無新意，只係將啲舊嘢炒埋一碟，可以不理咁話。

Ariel同知情人士傾過，佢話唔可以講中央對香港政策變咗，因為白皮書講的原則一早存在，但一些表述的確係新提法，除咗好多人都留意到的「全面管治權」之外，其他例如話香港的高度自治具有「監督權力」，仲有一句話對特區政府「作出新授權的權力」，都係新提法。

知情人士話，當香港有些人將高度自治講成「完全自治」，阿爺就從另一方面講，我俾你的權我會監督住你使用，可以對你作出新授權，也可以收番以往作出的授權，試圖扭轉有些人當香港自治係無限制的想法。

阿爺確立呢啲睇法之後，潛台詞就係如果你玩得過份，我隨時可以出手過問，你到時唔好話我干預，我有權咁做。結論係阿爺都相當硬架。