超錯

前兩天看到伊拉克反政府武裝分子攻陷伊拉克第二大城市摩蘇爾、50萬伊難民大逃亡的消息，心諗「唔係呀嗎? 咁失敗?」美國2003年3月發動對伊拉克戰爭，推翻候賽因政權，建立親美政府，11年後，呢個政府危在旦夕，反政府軍攻到首都巴格達50公里之外，真係睇戲都無咁戲劇性。

記得2003年美軍攻入巴格達後，剛好前參謀長聯席會議主席鮑威爾訪港，在一個私人早餐會中，我問他怎樣看小布殊政府對伊拉克的軍事行動? 他說在老布殊政府任內，他當參謀長打海灣戰爭，當時伊拉克入侵科威特，聯軍決定攻打伊拉克，42日空襲掃平伊拉克部隊，本可攻入首都巴格達，捉拿伊拉克總統候賽因，但老布殊決定唔攻，因為認為打咗入去，都「無法管治」。鮑威爾咁答，都表明佢對小布殊打入巴格達的睇法。

當然，小布殊發動第二次伊拉克戰爭，都有特殊背景。2001年9月美國發生911慘劇，小布殊政府無法追尋到發動911襲擊的主腦拉登，就改為和當時的國家安全顧問賴斯設計出「邪惡軸心」(Axis of Evil)呢個咁有創意的說法，將伊拉克、伊朗和北韓定為「邪惡軸心國」，呢個講法雖然有啲「細路」，好似美國漫畫的情節，但勝在容易入腦，成功將美國人民在911後的憤怒情緒，由無影無踪的拉登，轉移向這三個有形有跡的國家。

小布殊的智商據說只有91(低於100低於常人)，但勝在行動大膽，就在2003年3月動手，基於一些叛離伊拉克人士不太可靠的證詞，話伊拉克總統候賽因發展「大殺傷力武器」(Weapon of Mass Destruction)，聯同多國部隊，就此發動對伊拉克的戰爭。結果在一輪轟炸後，開戰三星期後攻入伊拉克首都巴格達，開戰兩個月後到2003年5月，小布殊就在航空母艦林肯號上，在《任務完成》的大橫額前，宣布勝利。這亦成為經典的一幕，因為要到7年後，到2010年8月，戰爭才真正結束。

http://www.history.com/speeches/george-w-bush-declares-mission-accomplished#george-w-bush-declares-mission-accomplished

美國對伊拉克戰爭唔止宣布勝利兒戲，開戰的借口更兒戲，美軍最後拘捕及處死候賽因，但反轉成個伊拉克，都搵不到任何「大殺傷力武器」，之前傳到好勁的什麼「超級大炮」之類的東西，根本不存在，直接引發伊拉克戰爭的伊拉克變節者阿爾.賈納尼在2011年承認有關大殺傷力武器的說法「一切其實均為謊言。」候賽因真係死得寃枉。

好多人話小布殊做咗佢老豆唔敢做的事情，都係為咗石油。問題係扶起一個傀儡政權，但最後都守唔住，即使從美國角度，又得到乜嘢好處呢? 2008年美國爆發金融海嘯，奧巴馬上台後為節省軍費，決定全面從伊拉克撤軍。2011年12月美軍全面撤退，奧巴馬當日仲話伊拉克政府係美國「強大和永久的夥伴」。可惜呢個美國扶起的政府看來既不強大亦不永久。美國媒體保守估計，有4100個美軍在伊戰中死亡，另外據維基解密在2010年10月22日所公佈的美軍檔案顯示，在伊拉克戰爭期間直接死於戰火的平民達6萬6081人。若最後伊拉克又落入反美力量之手，呢7萬人都係白死。

同樣地美國當日在阿富汗軍事介入打倒塔利班政權，亦唔叻得好多。佢今日為求抽身移師亞洲和歐洲，針對中國同俄國，就同塔利班和解並交換人質，搞到塔利班首腦馬上宣布勝利，並在巴基斯坦發動襲擊南部卡拉奇機場，導致28人死亡。你話美國又搞邊科?

記住，政客推年輕人上戰場，叫他們為一理想而奮戰，好多時不是錯，而是超錯。中國當年的文革如是，伊拉克戰爭亦如是。

盧永雄

世界盃今晚開波啦！巴西號稱足球王國，但搞世界盃就搞到一榻糊塗。今晚賽事開鑼，但開幕戰的聖保羅哥林多球場（Corinthians Arena）及其他至少兩座比賽場館仍未完全完工，呢個國家搞世界盃搞到好牙煙。

由6月開始，巴西抗議、罷工浪潮此起彼落，據聞身為主辦國元首的巴西總統羅賽夫，為了躲避巴西群眾的喝倒彩，不出席開幕式，成為歷屆世界盃開幕典禮的特色。當然，開幕禮能否順利舉行，仍是未知之數。惟一慶幸嘅係聖保羅地鐵工會同意恢復營運，不致令公共交通癱瘓。

香港人對巴西瞭解不多，睇波的朋友知道巴西足球了得，炒股的就知佢係「金磚四國」之一，就係知咁多啦。2001年，高盛首席經濟師奧尼爾（Jim O'Neil）首次提出金磚四國概念。四國是巴西（Brazil）、俄國（Russia）、印度（India）和中國（China），取其第一個字母，加起來成為BRIC，就係「磚」的發音。2003年，奧尼爾在一份題為《與「金磚四國」一起夢想》的研究報告中預測，到2050年，世界經濟格局將重新洗牌，「金磚四國」將超越包括英國、法國、意大利、德國在內的西方已發展國家，與美國、日本一起躋身全球新的六大經濟體。

當年好多香港人都有買過「金磚四國」嘅基金，不過，如果揸到依家，就十居其九「瀨嘢」啦。巴西以至好多新興經濟體的確威咗10年，增長好快。巴西更一度躍升至全球第六大經濟體的地位。不過由於巴西經濟太過依賴原材料出口，尤其係鐵礦，2008年的金融海嘯及國際市場的疲弱，對原材料需求大幅下降，直接打擊巴西經濟。2011年和2012年的經濟增速明顯放緩，巴西2011年國內生產總值（GDP）增長只有2.7%，2012年再降到0.9%，去年略為反彈，亦只有2.3％。今年仲差勁，市場剛剛將巴西經濟增長預測從1.5%調降至1.44%，2015年的預期則由原先的1.85%調降至1.8%。以新興國家計，相比起中國7.5%的增長，巴西呢啲低增長率等同衰退。

巴西經濟增長率大降，但物價急升，通貨膨脹率高踞不下，一個漢堡飽賣130港元一個，民眾根本挨唔住，加上犯罪活動日益猖獗，政治非常唔穩定。巴西人民見到國家主辦世界盃花費了約110億美元，自然感到非常憤怒，唔抗議逼政府改善生活至奇啦。

藉著世界盃這件盛事，巴西的情況亦見見日報，使我們對巴西多些瞭解。巴西的經歷給了我們一個教訓，經濟搞唔好，國家窮困，人民受苦，講乜都無用。

至於香港，將要面對的一個難點，就是如何處理自由行的問題。香港政府提出要削減自由行，商界憂慮不已，但市民額首稱慶，據友人反映，週六周日，沙田新城市廣場，自由行旅客多到水洩不通，已經造成市民好大不便，怨聲四起。民意所趨，看來政府不減不行。關鍵係究竟如何落刀？削減幾多？政府出手時務必十分小心，不要落藥過猛，搞瓜經濟，睇波之餘睇吓巴西的經濟慘劇，記住唔好俾自己窮呀。

盧永雄