美女高管上周五whatsapp我，話「中石油883 $10 sell 左一半，少gain 15%先」。美女高管在8.7元左右聽咗我講買咗隻中海油，隻嘢9月7日除淨，而家沽仲收埋0.2元息，即係賺17%，收割吓絕對無壞，佢仲話要請我食飯。
美女高管鐘意買大股，賺15%、20%就走。我以前問過佢，騰訊升咁多，你賺咁「少」，心理平唔平衡? 佢話至緊要有賺，升得多的股票佢都買過，例如恒大(3333)，4元買坐咗幾年，到開車時又係賺少少就走咗，美女高管睇得好化，錢係你就係你的，還是那一句，有錢落袋最緊要。
佢都有佢的道理，有朋友用網上券商富途買股，去年打過和無賺蝕，但系統告訴他，他的表現好過90幾%其他用戶，即係90%人買股係唔賺錢。
油價一年圖
講番中海油，其實和油價相關。過去一年，油價在高位54.3美元和低位42.5美元中間走動，低位對高位有27.8%空間。而中海油股價低位8.45元，高位10.88，低位對高位有28.8%空間，兩者波幅驚人地接近，雖然高低位時間略有不同。中海油去年10月25日見高位，當日收10.7元。而油價則在今年2月21日見高位，但2月油價見高位時中海油已經跟唔上。
中海油一年圖
今次中海油股價圖好似一個大圓底咁升番上來，和油價回升及中海油本身上半年業績表現良好有關。油價受外圍影響，但業績有其本身的因素。
油價未來還有向上走的空間，俄羅斯總統普京話和石油出口國組織同意將減產協議維持到2018年，對油價有支持。油價現在51美元，即使做個雙頂，可以去到54美元。若油價到此水平，估計中海油有機升穿10.5元，到時就是收割的時候。中海油的好處是肯派息，坐坐吓坐過中期就收2厘息。
陸羽仁
** 博客文章文責自負,不代表本公司立場 **
積金局公布最新數字，截至去年12月底總共有920萬個強積金帳戶，每個計畫成員平均持有15.4萬元，再細看當中87萬個帳戶累積超過20萬，3萬個帳戶累積超過100萬元，更有逾90個帳戶累積超過1000萬，估計這些1000萬大戶都是源自過去的職業退休計劃轉過來的。
積金局亦公布了自2000年12月至今年7月，強積金年化回報率是4.3%，跑贏同期的1.8%通脹。
坦白講強積金的回報上升，同今年以來股市上升有很大的關係，在去年股市較低迷時，得出來的數字就會較差。不過無論如何，目前只有3萬個強積金帳戶累積超過100萬，如果假設這些百萬戶都是累積得比較耐、比較接近退休年齡的話，即只有0.3%的人有100萬，而100萬又夠不夠退休呢？
按保險界朋友告訴我，現在新出的保單所有人壽命的假設都是100歲，或者現在的中年人到他們老年時，人均壽命未夠100歲，但是超過90就好唔奇。試想一下，做到60歲退休，去到90歲就還有30年，將100萬直缐除以30年，即每年只有3.3萬元，一個月就只有2778元，即使加埋政府的生果金，約4000元，在香港這個社會生活，都相當艱難。還不要忘記有100萬的只是0.3%強積金戶口，其他大多數人更只得幾十萬，靠它食糊就真係死得人多。
問題就來了，除了強積金戶口之外，大家又有幾多積蓄呢？按我很粗略地估計，以兩公婆計如果退休時唔揸住500萬，退休後的尾段生活都幾潦倒，原本一個中產生活，就會慢慢倒退到一個基層生活。
我就覺得香港本來就有中產貧化的現象，主要來自兩個方面，一是消費的開支大增，另一是子女的開支大增。
消費開支都不外乎衣食住行，飲食旅遊的消費可以使到好大，香港人近年旅遊的次數愈來愈頻密，去的地方又愈來愈遠，花的錢又愈來愈貴，花十幾萬去南北極睇吓極光都是好普遍的事情，這部份的開支已經不少。
另外就是仔女的開支，其一就是出外讀中學或大學的使費，好多中產在子女高中時就就送他們出外國，以送去英國為例，每年都要40、50萬。如果只讀三年大學，一個仔女就要150萬落樓，讀埋兩年預科就共要250萬，兩個就要500萬。這些看似不一定要支付的開支，好多中產無想清楚就做了，當送了大仔或大女出去時，後面嗰個想唔俾佢出去都唔得。
好多仔女在外面讀完書，學成歸來，都未必一定找到高薪厚職，因為現在大學生周街都是，都係賺緊萬幾元一個月，飲完鹹水回來，可能過幾年就會叫阿爸阿媽俾錢佢做首期買樓，現在新界郁吓都要400、500萬一間，一個仔給200萬做首期，兩個就400萬。如果你有兩個仔女去外國讀大學，返來又要俾錢做買樓首期，一個套餐隨時要1000萬落樓，可能將中產的所有積蓄燃燒掉。
結論是強積金不可靠，個人消費與仔女的開支條數又大，如果不努力搵錢儲錢，老來生活堪憂。
