過唔過夜有盤算

「佔中」預演，結果警方拉咗511人，連國際傳媒都有報道，三名立法會議員仲可能會俾警方落案檢控。但睇晒警方拉人名單，有較溫和的民主黨，但就唔覺有一向對佔中較支持的公民黨。

民主黨被視為溫和泛民，最想政改過關，但七一遊行後，有唔少民主黨員都留低「佔中」，最後何俊仁同一啲區議員被拉，民主黨事後話個別黨友係以個人名義支持，不認為自己無支持「佔中」，照咁睇民主黨好似行得仲前。

反而公民黨一直參與籌劃佔中比較多，就冇人留守喺遮打道，不過天光後佢哋就派咗人參與，就係喺等五百幾個示威者俾人拉晒去黃竹坑之後，派咗十幾個義務律師幫啲被捕人士！

有政壇口痕友話，睇嚟做事務律師多啲的民主黨（何俊仁俾人拉埋）、同大狀為主的公民黨喺呢件事上有不同的表達方式喎。大狀出口，事務律師出手。睇嚟過唔過夜、佔唔佔中，各有盤算。

仲有今次被拉的人，都係佔領遮打道嘅，學民仔喺特首辦，一直都係留喺示威區，無阻住條街，所以就算警方拉人，都好難告得入，結果包圍特首辦至早上「和平」結束啦，睇嚟阻唔阻街會成為將來處理佔中的重要元素之一。

Ariel

** 博客文章文責自負,不代表本公司立場 **

七一又遊行又佔中咁多事，幾乎忘記講吓今年的授勳名單，出現一、兩位泛民的名字，民主黨羅致光獲授金紫荊星章，呢個唔覺意外，佢近年喺扶貧工作上與政府都做咗幾多嘢。但何秀蘭同莫乃光成為太平紳士，政界就有啲唔係太理解。

據聞係有問責官員覺得表面上工黨雖然比較激，但私底下同政府官員算係有偈傾，所以就覺得可以俾個JP(太平紳士)何秀蘭。

政府始終都想過到政制方案，要過到，都要有五、六票泛民票，喺授勳上俾啲「荷蘭水蓋」泛民，希望有助降降溫，唔好搞到雙方拉得太行，冇晒偈傾。

但Ariel睇嚟就唔容易，即使係在私底下同政府喺好問題上有偈傾，但喺政制問題上好難傾，所以呢個「荷蘭水蓋」俾咗都未必有用。大家都睇到啦，李卓人佔中個晚都有出來啦，唔見得工黨可以喺政制上傾得到喎。