政事
立法會明天(7月9日)召開今個年度最後一次大會，主席就預留咗會議可以開到下星期二，即係15日，依家手頭上有五條條例草案恢復二讀同三讀，要審議通過，其中收雙倍印花稅的辣招草案，排喺第四條，各方都估計唔出意外可以過到。
原本勁反對的經民聯，據聞佢哋提的三個修訂中兩項會自動撤回，只剩低代表地產界的石禮謙繼續提修訂，但預料亦不會獲得通過，知情人士話，工商界議員肯讓步，係私下有偈傾，雖然官員唔會公開承諾，但政府話適當時候會作出檢討。
泛民果邊，激進泛民亦唔搞辣招稅，尤其係大舊陳偉業公開講過，唔會喺審議辣招稅時拉布，所以喺最後一日(即係15日)，應該可以夠時間過到。
Ariel唔係黑心，依家議會內外形勢緊張兼千變萬化，至驚到時有啲咩意外，例如點人頭時唔夠數搞到流會就大鑊啦，希望呢條有利遏抑樓價的條例草案，可以順風順水啦。
Ariel
** 博客文章文責自負,不代表本公司立場 **
佔中預演餘波未了，正當大家睇緊點收科之際，忽然民主黨主席卿姐爆出，最快今個月就「佔中」，搞到何時「佔中」突然間成為政界議論焦點。
「佔中」發起人戴耀廷喺全民投票後仲講緊，暫時無打算號召「佔中」，要等到政府提出普選方案，佢哋會再進行第二次民間公投，如果最終政府一意孤行，意圖通過非真普選方案，才會發動「佔中」。
而家政府仲搞緊政改諮詢文件，到佢交報告俾人大，應該唔會公布住，即係話睇唔到政府方案係唔係真普選方案，咁話最快7月佔中，都要有個理由，暫時睇唔到有乜理由咁搞。
到八月下旬 人大常委會開會，若果只否定公民提名，無講明係提委會過半數機構提名，都未肯定唔係真普選方案，理論上都無公民提名都可以有方案係符合國際標準架。若然係咁，照計仲要等一段時間，去到政府抛出方案後，先去到佔中呢步。
政壇高人就覺得，可能係成個政局愈來愈劍拔弩張，後生仔預演佔中亦都搞出一啲聲勢，溫和泛民同學者型的佔中三子，在呢場運動激化過程中，似有被邊緣化，唯有講得激啲啦。先有卿姐喺城市論壇，爆料話民主黨最快呢個月、最遲下個月就要「佔中」，仲話「佔中」運動要 一波接一波。跟住「佔中」另一發起人陳健民話，如果人大常委會八月否定公民提名及政黨提名，又收窄至沒有真普選空間的，就是「佔中」時刻。
搞到本來好似未有時間表的「佔中」，忽然殺到埋身啦！
