卿姐開口後 大孖沙急問人大會期

而家的政治氣氛搞到人都顛，一向溫和的民主黨，開完會之後都講最快7、8月佔中。到底7月同8月有乜事?

7月是政府提交政改諮詢報告，估計會在7月中，即係下個星期交報告，報告會公布，但唔好期望有乜驚天動地的事情。首先報告一定唔會支持乜嘢主流方案，只會羅列吓不同方案的民意，所以不用擔心報告推銷「提委會過半數提名」的方案。另一個敏感部位是對公民提名的表述，不過報告會否具體否定公民提名，亦令人存疑。

換言之，泛民應該無乜理由睇完政府個報告，就話將來的普選一定不是真普選，要佔中。(各方和政治有關人士要放假尚可在7月放)

真正堅料是在8月下旬人大常委會開會後的決定。卿姐說8月可能佔中，搞到中環大孖沙個心好唔定，係咁追問西環，到底人大常委何時開會。按平常日子，人大常委會在23日開會，開兩三日會之後有決定，但8月領導人去北戴河放假，所以會期未定得到。

聽聞中環大孖沙好緊張，有點怕佔中搞大，所以不如遲啲返香港。亦有人諗住中環的生意，要安排如何走鬼。總之有啲擔心，有啲頭痕。好多人都唔敢對「和平」兩個字抱太大期望，因為激進泛民在立法會內已經咁激，在街頭玩佔中呢味新嘢，無人可以控制他們。所以大孖沙唔放心，都有一定道理。

Ariel

** 博客文章文責自負,不代表本公司立場 **

立法會明天(7月9日)召開今個年度最後一次大會，主席就預留咗會議可以開到下星期二，即係15日，依家手頭上有五條條例草案恢復二讀同三讀，要審議通過，其中收雙倍印花稅的辣招草案，排喺第四條，各方都估計唔出意外可以過到。

原本勁反對的經民聯，據聞佢哋提的三個修訂中兩項會自動撤回，只剩低代表地產界的石禮謙繼續提修訂，但預料亦不會獲得通過，知情人士話，工商界議員肯讓步，係私下有偈傾，雖然官員唔會公開承諾，但政府話適當時候會作出檢討。

泛民果邊，激進泛民亦唔搞辣招稅，尤其係大舊陳偉業公開講過，唔會喺審議辣招稅時拉布，所以喺最後一日(即係15日)，應該可以夠時間過到。

Ariel唔係黑心，依家議會內外形勢緊張兼千變萬化，至驚到時有啲咩意外，例如點人頭時唔夠數搞到流會就大鑊啦，希望呢條有利遏抑樓價的條例草案，可以順風順水啦。