德國7:1血洗巴西，身為德國總理的超級球迷默克爾應該會興奮到瞓唔著，不過，佢早幾日帶咗大量中國訂單俾大眾汽車、空中巴士等，呢啲公司的老細應該會仲高興啲。
默克爾呢轉中國行，都可以話施出渾身解數，喺四川行街市買餸，仲學煮宮保雞丁，可謂入鄉隨俗到加零一，可能好多國民好like。但毛拍手就睇到佢背後來的幾十位德國商家，去到北京，當然係幾億甚至幾十億合約咁簽啦，但睇番啲合約除咗買空中巴士的100架民用直升機，其他都係合作項目，依家北京都會睇住買唔買到技術嚟考慮合作。
中德關係呢期又係得埋番啲，可能係老美「逼」出來。話說七月一日果日，當香港各派勢力都睇住遊行同佔中預演時，其實喺國際有單大新聞發生咗，法國最大銀行、法國巴黎銀行(BNP Paribas)與美國司法部及其他的監管機構，達成咗協議，承認犯美國的禁令，美國司法部門開出歷來最高的罰單，89.7億美元(折合約港幣695億)，嘩，係咪天文數字呢，同時法巴仲會被禁止參與部分美元結算活動一年。
呢單嘢係法巴被控在2002年至2012年期間，違反美國制裁令，向蘇丹、伊朗同埋古巴的客，提供超過1900億美元的結算服務，係被調查期間，其實BNP一直同美國的監管機構，就認罪協議商討，當時市場傳過話要罰超過100億美元，法國政府出埋聲幫口，話美國要求罰款太高，質疑係藉此打擊歐洲銀行，等美資銀行受惠。
最後講數講到唔使90億，都叫咗低過市場預期，但法國政府氣頂就難免，話晒都係法國主要銀行，涉及國家重大利益，依家俾老美話罰就罰，但做得國際金融機構，都係以美元結算，唔玩美國玩美國的遊戲，邊得嚟咁多美元做結算呢？！幾大的金融機構都要頂住氣跟美國的規則嚟玩，正所謂「硬食」，簡直有啲名正言順去搶錢咁的勢，你係法國會點諗呀。
不過法巴只係歐洲銀行惡夢的開始，外電話陸續仲有法國農業信貸銀行、法國興業銀行，仲有德國德意志銀行等，仲話德銀同美國司法部開始談判，至於到最後以罰幾搞掂，就睇吓德國政府有幾大牙力同老美傾啦。
呢啲局出來，好明顯老美大國主義太強，而歐元又未夠強同美元，谷住道氣，聞說第一個影響係法國愈嚟愈想搞大歐元，唔靠美元。第二個影響係令中歐行番埋啲，空間亦多咗啲。在意識形態上，民主歐洲當然會覺得中國係邪惡政權，但面對老美咁大國主義壓落嚟，國家經濟利益分分鐘鐘受損喎，喺經貿上攞生意同中國行得埋啲，都係保障自己的做法。
以習大大為首的阿爺又點會睇唔到呢個棋局呀，有時同歐洲行埋啲，一來牽制吓老美，二來都唔使被美國逼得緊時，要全部雞蛋放喺俄羅斯身上呀！國際新聞都係多留意吓好啲，依家中美喺香港已經紥晒馬的姿態，呢個中美、中歐、歐美、中俄、美俄、俄歐的大搞作，都可能影響香港架。
毛拍手
** 博客文章文責自負,不代表本公司立場 **
