康宏案越搞越精彩，昨日公司就入稟高院，向24個個人同埋4間公司追討，涉及超過10億元的有問題賬目，又指大批股份由前股東曹貴子非法轉移和操控，要求法庭宣布這批股份轉讓無效。
入禀狀裏面清楚說了，曹貴子雖然長時間唔係康宏的董事，但係以巨大利益操控公司管理層，管理層按佢的指示行事。
有街外人評論，康宏單案與訟人有28個單位，加上經濟犯罪案件異常複雜，唔係咁易搵到證據喎。
康宏入稟狀。
但有料人人士話，入稟狀裏面已經提供了線索，曹貴子係用一個神秘嘅電郵戶口，佢賬號係financial 9101@gmail.com，而9101，剛好係康宏上市編號1019的倒寫。入稟狀就指曹貴子用用呢個賬戶，同康宏一班當時的高管經常保持秘密聯繫，甚至發出指示，叫佢地如何操控公司的運作。
有人就話，呢啲咁秘密的電郵來住，一出事就可以刪除，公司係唔係咁容易搵到電郵證據啊？
入稟狀都透露咗啲線索，證監會係今年6月，去搜查過康宏辦公室，攞走大量文件同埋電腦資料。
而公司就係在今年7月，第一次知道曹貴子那個神秘嘅電郵戶口存在。可以想像，即使刪除了的戶口資料，在現今的科技下，也可以復原。公司似乎掌握咗關鍵的電郵資料，先至可以將曹貴子操控公司的網絡，好似剝洋蔥咁，一層一層剝開。
曹貴子 (資料圖片)
有趣的是，消息傳來，廉署睇到康宏入稟狀之後，覺得曹貴子都好有問題，可能會發出拘捕令，要去通緝佢。
而家至少可以有個結論，就係康宏新管理層和證監會同埋廉署有緊密合作，要將原管理層操控公司涉及的罪行，一一查清楚。
由於新管理層係由康宏主要股東之一台灣富邦派去的，就有報導話呢次係台灣富邦系，同埋深圳系股東之爭。呢啲講法好有轉移視線之味道。說到底，關鍵係曹貴子和原管理層有無做過違法嘅事，如果無做過，無人會屈到佢地喎，點告點查也不會有結果。
Ariel
** 博客文章文責自負,不代表本公司立場 **
