丘成桐忠告有意思

中學文憑試放榜，「學民思潮」召集人黃之鋒也是考生之一，他的成績自然成為話題。他只公開考獲中文4級和通識5級，沒有透露整體成績，只說已符合大學收生「3322」最低要求，預計有一半機會升讀大學，但已報讀城大副學士的公共行政管理課程。

黃之鋒言談間對部份成績有啲失望，話原先期望通識考到5*，結果是5。被問到參加社會運動有否影響學習，黃之鋒話「不參與社會運動，亦不見得成績會好很多。」

黃之鋒的文憑試成績成為討論焦點，Ariel估其一個原因是他只是中學生已積極投身社運，有別於一般人理解起碼讀完中學入咗大學才搞社運。所以外界關心佢咁細個能否兼顧社運與學業。

這使人想起哈佛講座教授、知名數學家丘成桐去年初曾慨嘆，香港學生重抗爭輕學業，只會令本港人才質素漸走下坡，最終淪為二等城市。

唔好以為丘成桐反對搞學運社運，佢只係認為兩者要兼顧，佢話學生為捍衛真理和正義，參與學運是理所當然，自己年輕時也曾參加學運。

佢在1970年代於加州讀書時，曾參與當地華人學生發起的保釣遊行，希望保衛國土。不過佢認為，若要達到目的，首先要令中國強起來，而要令國家變強，必須有一群學識、魄力兼備的年輕人，建構有能力的政府。佢又認為如果學生遊行目的是為了社會好，就更應踏實地學好知識，立定目標為社會做好事。

Ariel都幾認同丘教授的講法，要學好知識，才可以為社會做到好事。

Ariel

** 博客文章文責自負,不代表本公司立場 **

喺爭議聲中成立嘅金融發展局，眨吓眼就成立年幾，發表第一份年報，幾十頁概括總結過去頭十五個月工作，Ariel去睇睇，發現金發局成立時雷聲夠大，係政府高層次同跨界別諮詢機構，但份財政報告非常簡單，夾埋只有四大個開支項目，一頁紙搞掂晒，全年使咗二百幾萬啫！

金發局成立到而家，人手基本上都係由證監會、金管局等借調過嚟，財經事務及庫務局支援秘書及文書，結果過往發表六份研究報告，就試過出現有啲得中文，有啲得英文。

但主席查太史美倫並無氣餒，仲話今年會繼續對外推廣，遲啲就會拍住貿發局去巴黎做推廣！又會黐實港交所，例如佢哋去搞滬港通，金發局都出一份力去一齊搞推廣活動。

外傳金發局出場後，被現有的財金部門成功凍結，呢啲講法係真係假不得而知，總之從金發局盤數睇，睇佢使錢就認真慳家。