世界盃完咗，但巴西呢兩日仍然係國際新聞的關注點，佔世界總人口40%的金磚五國領導人呢兩日在巴西開峰會，今次會議最talk的話題，當然係成立金磚五國開發銀行同設立應急儲備金，外界的評論集中喺呢個動作，係要同歐美主導的世界銀行和國際貨幣基金組織抗衡吓，有人話可以增加金磚國家喺國際金融事務的話語權，但亦有人覺得金磚五國各有問題，要同歐美分享話語權，談何容易呀。
雖然西方分析員唔太睇好，但金磚五國當然唔會咁諗，有資金就有實力，開發銀行啟動資金是500億美金，而儲備基金則有1000億，正如巴西總統話齋，唔多唔少都將是一個能夠抵禦金融動盪的"安全網"。為咗總部設立問題，中印過去仲爭住要總部設立喺自己國家，最後拍板落戶上海，相信係中國經濟增長速度較其他金磚國家，始終係被睇高一線，外界對呢個決定亦唔意外。
Ariel本來都當呢單嘢純粹的國際新聞、國際局勢分析嚟睇，冇諗過同香港有關，但聽完熟悉情況的高人分析，突然眼前一亮。
高人話，一個擁有咁大筆資金的國際金融機構，總部設在上海，將面臨一些問題需要解決，人民幣未自由兌換，上海發展再快，暫時都唔可以在完全國際化金融環境下運作，但呢個機構的資金投放同進出，都涉及大筆的外匯，到時上海必須要有離岸服務等。
而香港同上海最大的分別，就係香港係一個完全喺西方普通法下建立的國際金融中心，貨幣自由兌換，港元同美元變相掛鈎，同世界國際金融環境基本接軌，咁香港係咪可以協助金磚五國開發銀行上海總部，處理同執行一些必須喺國際金融環境下運作的業務呢？而且呢個機構係會不斷成長，啟動的500億資金，既需要管理，將來亦要到外面去投資，香港可以有空間去協助喎。
香港依家成日話要尋求進一步鞏固國際金融中心地位，陳家強局長同埋金管局陳總，快啲諗吓香港係咪可以有角色啦，始終金磚五國擁有40%的世界人口，經濟總量達全球五分之一，唔好睇小呀。
Ariel
** 博客文章文責自負,不代表本公司立場 **
好多事，真係好多事發生過的立法會今個會期終於結束，最後關頭，辣招稅有驚無險下，草案以49票贊成，7票反對通過。
財經事務及庫務局局長陳家強話感到高興，認為條例草案在暑假前獲通過，是對市場傳出正確訊息，希望有助樓市平穩發展。除咗呢啲例牌發言，Ariel仲留意到家強局長仲話一年內將會向立法會檢討有關條例，會密切注意市場各項指標，對樓市作適當調整。
知情者話「一年內檢討」係同經民聯等工商界議員妥協的結果，佢哋讓步支持，政府就承諾檢討，唔知市場會唔會當做利好消息炒作吓，但呢個檢討並無任何承諾，講得幾闊吓，依家樓市係升緊唔係跌緊，到時檢討完調整可升可跌，到時再收緊都得。
記得當初推辣招草案時，有議員提過設立日落條款，例如三年後自動撤招，到時有需要時先再立法，呢個提法就強勁好多，因為必然會睇到日落，但依家一年內檢討，就係到時睇吓啫，係觀賞吓日出定係日落的條款，效用就應該不太大啦。
