政總今日圍起東翼對開廣場，加設圍欄，增強保安，由於前事無特別宣布，在政壇引發唔少討論。
添馬中人話上月立法會被示威者衝擊，玻璃門被打爛，確實引起要檢討政總保安的議題，而評估結果就係政總都有潛在風險，需要加強保安。至於點解係今日做，因為要封的位置包括埋政總同立法會的通道，官員去立法會或者議員同助埋去政總都要行呢條路，所以咪等立法會休會期間進行。
不過，吊詭的係工程預計八月底完成，剛好係人大常委開會討論香港政改的日子，好大機會人大常委會會否決公民提名，部份激進泛民已揚言一旦公民提名被否決，就會佔中，政總都好難唔受波及。
Ariel認定呢啲係佔中防御工事啦，有官府中人當然唔會公開承認啦，不過佢哋的語氣就令人想起三個字：你懂的。
Ariel
** 博客文章文責自負,不代表本公司立場 **
世界盃完咗，但巴西呢兩日仍然係國際新聞的關注點，佔世界總人口40%的金磚五國領導人呢兩日在巴西開峰會，今次會議最talk的話題，當然係成立金磚五國開發銀行同設立應急儲備金，外界的評論集中喺呢個動作，係要同歐美主導的世界銀行和國際貨幣基金組織抗衡吓，有人話可以增加金磚國家喺國際金融事務的話語權，但亦有人覺得金磚五國各有問題，要同歐美分享話語權，談何容易呀。
雖然西方分析員唔太睇好，但金磚五國當然唔會咁諗，有資金就有實力，開發銀行啟動資金是500億美金，而儲備基金則有1000億，正如巴西總統話齋，唔多唔少都將是一個能夠抵禦金融動盪的"安全網"。為咗總部設立問題，中印過去仲爭住要總部設立喺自己國家，最後拍板落戶上海，相信係中國經濟增長速度較其他金磚國家，始終係被睇高一線，外界對呢個決定亦唔意外。
Ariel本來都當呢單嘢純粹的國際新聞、國際局勢分析嚟睇，冇諗過同香港有關，但聽完熟悉情況的高人分析，突然眼前一亮。
高人話，一個擁有咁大筆資金的國際金融機構，總部設在上海，將面臨一些問題需要解決，人民幣未自由兌換，上海發展再快，暫時都唔可以在完全國際化金融環境下運作，但呢個機構的資金投放同進出，都涉及大筆的外匯，到時上海必須要有離岸服務等。
而香港同上海最大的分別，就係香港係一個完全喺西方普通法下建立的國際金融中心，貨幣自由兌換，港元同美元變相掛鈎，同世界國際金融環境基本接軌，咁香港係咪可以協助金磚五國開發銀行上海總部，處理同執行一些必須喺國際金融環境下運作的業務呢？而且呢個機構係會不斷成長，啟動的500億資金，既需要管理，將來亦要到外面去投資，香港可以有空間去協助喎。
香港依家成日話要尋求進一步鞏固國際金融中心地位，陳家強局長同埋金管局陳總，快啲諗吓香港係咪可以有角色啦，始終金磚五國擁有40%的世界人口，經濟總量達全球五分之一，唔好睇小呀。
