政事
「保普選反佔中大聯盟」代表下午與政務司司長林鄭會面，反佔中聯盟昨日公布攞到93萬個簽名，同佔中運動的79萬公投票打對台。
最新消息傳來，話反佔中大聯盟諗緊在8月17日搞「大巡遊」。唔知「大巡遊」呢個名係唔係隨意講，同遊行有無分別。
不過消息靈通人士話，照計反佔中都係一件嚴肅事，唔會搞出年初二那種花車巡遊，所以即使真係叫「巡遊」，可能只係唔想好似太政治化嗰隻，但實質都一樣，都係一大班人天時暑熱在街上行。
若然搞得成事，花生友又難免將「大巡遊」同7.1大遊行相比較，睇吓反佔中多唔多得過7.1大遊行人數(民陣官方公布51萬，綜合學者估算在13萬至17萬之間)。
你搞一樣，我又搞一樣，社會兩大陣營分裂的味道好明顯，好有你做初一，我就做十五的味道。
Ariel
** 博客文章文責自負,不代表本公司立場 **
《主場新聞》唔做，網媒經營唔易，令人齊聲一嘆，深感香港這個資本主義社會，錢唔係萬能，但無錢就萬萬不能。
《主場新聞》在2012年7月28日創刊，但在《主場》創刊前，蔡東豪拍住一班做內容的精英，已經承包咗《蘋果日報》財經版一個「金融中心」專版嚟做，當時傳聞肥佬黎幾睇得起蔡東豪，好大手筆一年俾500萬佢搞呢個版，若然屬實，一個月有42萬，都好見使。所以蔡東豪就在觀塘租了辦公室，請專人去搞。亦由於有那筆「打底數」，後來就搞埋《主場》，反正都請咗骨幹，亦有辦公室，因利承便搞埋網媒。
不過《蘋果日報》呢筆錢去年就生變，由於肥佬黎有指令要《蘋果日報》削減5%開支，各部門都要諗計慳錢，最直接係削5%人手，但可以唔斬人，無主管想殺人。去到財經組，佢地就話要慳不如慳「金融中心」專版那一筆，《蘋果》財經組覺得那一版講政治多過講財經，對佢地可有可無，與其叫佢地殺自己人，不如斬咗「金融中心」那一版。
結果講數之下，亦無斬晒，就將「金融中心」由每週五次減到一次，《蘋果》財經組傳聞「金融中心」開支由每年500萬減到200萬(數字只是傳聞無法核實)，財經組中人話抹一額汗，慳番幾百萬，佢地就唔使裁員減薪啦。
有人快樂就有人愁。《蘋果》財經組開心，《主場》收益減少自然傷心。估計《主場》每年開支約1000萬，《蘋果》「金融中心」的500萬收入是主要收入來源，隨時佔《主場》收入的8、9成，一減就無一大截。而且萬一《蘋果》有第二波節支潮，剩番呢200萬隨時無埋，令人諗起都心寒。
做生意係咁，睇到曙光好多人願意捱，但當佢一盤生意嚟做，又唔見曙光時，就唔會頂落去。
