自由黨拉謝偉俊入黨

中央港澳工作協調小組組長張德江早前見經民聯和自由黨時明示，中央不會叫特首梁振英在任期中離任，等如叫大家死咗條倒梁之心。自由黨主席田少回港後，傳出佢收回過去提供俾自由黨用的總部物業，令人忖測夠膽公開提問特首會否辭職的田少，是否已萌退意。

接著又傳出田少拉林大輝入黨，仲想讓埋個黨魁俾大輝做，又俾埋新界東個位大輝去選直選。田少又好似意興闌珊喎。

不過有高人唔係咁睇。佢話田少拉大輝入黨呢件事傾咗一排，傾得七七八八，西環都好支持，希望大輝入去做黨魁之後，自由黨會乖番啲。不過事實上唔係咁易搞，唔好當田少、周梁同劉健儀，佢哋咁容易俾人玩轉自由。高人話，過去一直傳，田少讓出新東個直選位後，唔係唔選，係想選超級區議會議席。

其實田少唔止想拉林大輝入自由黨，仲想拉謝偉俊入黨。聽聞Paul Tse都好有意願，但佢的地頭九龍東人士意見好大，佢靠陳振彬支持上位，但陳唔太支持Paul Tse入自由黨。所以件事仲要磨吓。

嘩，咁樣砌一砌個局出嚟，若然田少成功拉到大輝和Paul Tse，自由黨由5個立法會議員增加到7個，同一樣有7個議員的經民聯平起平坐，若然田少選埋超級區議會當選入局，手執幾十萬票，聲都大好多啦。

不過話得說回來，田少見張德江後，呢個自由黨膨脹大計，到底會加快還是放慢呢?

Ariel

** 博客文章文責自負,不代表本公司立場 **

「保普選反佔中大聯盟」代表下午與政務司司長林鄭會面，反佔中聯盟昨日公布攞到93萬個簽名，同佔中運動的79萬公投票打對台。

最新消息傳來，話反佔中大聯盟諗緊在8月17日搞「大巡遊」。唔知「大巡遊」呢個名係唔係隨意講，同遊行有無分別。

不過消息靈通人士話，照計反佔中都係一件嚴肅事，唔會搞出年初二那種花車巡遊，所以即使真係叫「巡遊」，可能只係唔想好似太政治化嗰隻，但實質都一樣，都係一大班人天時暑熱在街上行。

若然搞得成事，花生友又難免將「大巡遊」同7.1大遊行相比較，睇吓反佔中多唔多得過7.1大遊行人數(民陣官方公布51萬，綜合學者估算在13萬至17萬之間)。

你搞一樣，我又搞一樣，社會兩大陣營分裂的味道好明顯，好有你做初一，我就做十五的味道。