沙中線紅磡站擴建月台工程被揭發有鋼筋接駁位造假，港鐵會委任工程師黃志明作獨立第三者安全測試。黃志明今早在港台話，即將會進行大規模嘅負荷測試，如果涉事的部分承載力過關，結構就應該無問題。佢唔認為喺呢個情況之下，應該鑿開石屎檢查鋼筋。
立法會議員田北辰昨日話，聽聞有5000枝鋼筋被剪短，港鐵有責任將該段時間建造、最大嫌疑的5幅連續牆的石屎拆去，徹底檢查鋼筋是否被剪短，並進行重新加固。
黃志明顯然唔同意田北辰的講法，佢話從結構安全的角度來講，不應該鑿開石屎檢查鋼筋。他指出，現時鋼筋正在受力，鑿開石屎後會露出鋼筋，影響結構安全；加上即使鑿開石屎，也不能從鋼筋表面看到是否曾遭剪短，需要從連接器割出一個位置出來，才能證實鋼筋有否遭假裝成功連接。
另外前工程師學會會長黃澤恩亦有相似意見，佢認為政府獨立調查委員會應該盡快開展工作，並向相關人士錄取口供，了解5000枝鋼筋被剪短的可信性，亦都期望可以從中收窄有問題鋼筋的位置，因為而家單憑傳聞，佢認為唔係一個理性的方法，鑿去石屎，四圍咁鑿，亦都唔知道點樣入手。
而家傳聞滿天飛，一個人一種見，最後只能夠聽專家講，以安全為上。
Ariel
** 博客文章文責自負,不代表本公司立場 **
港鐵的工程新聞日日新鮮，曾經做過九鐵主席的立法會議員田北辰就不斷做評論家，日日插港鐵，港鐵主席馬時亨成為箭靶。
近期爆完沙中線紅磡站剪鋼筋事件，又爆會展站幅牆有問題，雖然會展站的問題是陳年舊事，早已修復，但係因為無通報政府的程序問題，港鐵被插到開花。
立法會議員田北辰。
既然陳年舊事都可以爆煲，爆爆吓又爆到西鐵元朗站有沉降問題。睇真啲元朗站由九廣鐵路負責興建，於2002年建成，當時田二少係九廣鐵路主席喎，睇佢評論元朗站沉降問題，就無評論其他港鐵問題咁輕鬆啦。
當年九鐵的顧問奧雅納低估元朗站地下溶洞數量，須進行額外工程補救，九鐵要向承建商額外支付1.3億元。按現在的社會上咁嚴謹的問責標準，呢啲都係工程失誤，九鐵管理層都要負責。
田二少解釋話，當時九鐵已知悉元朗站附近地質狀況，「都知如果元朗站附近有人起樓，一定會變成咁嘅現象⋯⋯在任何鐵路站附近進行建築工程，隨時有機會引致沉降」。記者追問九鐵有無其他架空路軌橋躉因附近建築導致沉降，田二少就話「咁我唔知喇」。
港鐵主席馬時亨的合約到今年年底，坊間評論話田二少係繼任港鐵主席的人選，不過港鐵的建築問題不斷俾人玩大之後，而家玩埋當年西鐵的建築問題，如果馬時亨因為工程問題要問責，不適宜再做港鐵主席，咁田二少都唔係咁啱做喎。
