裸的代價

「裸聊」案愈來愈多，唔少青年人貪刺激，結果墮入陷阱，警方今年頭七個月就接到375宗「裸聊」勒索案，涉及損失百幾萬。

為咗提醒市民，尤其是青年人小心「裸聊」騙局，屯門警區聯同嶺南大學，拍咗一段名為「裸的代價」的微電影，將裸聊勒索手法同防罪貼士，送給大家。

視頻截圖

呢段片由七位嶺大「罪案與青少年犯罪」學科的學生製作，Jack睇過覺得好有趣，故事講到一名學生墮入越南少女的「裸聊」陷阱，結果被一而再、再而三勒索。

呢班後生仔捨棄說教，反而喺故事同對白，引入年青少年熱門話題同「潮語」，雖然製作水平或能不及專業製作，但相信年青人會更加「受落」。

嶺南大學網頁照片

故事結尾係點？Jack留返俾大家自己睇，但據講佢哋去過中學播放，反應都唔錯！條片最近仲放埋上網添！

屯門警區警民關係組過去幾年，都與嶺大服務研習處合作，推出十幾個項目，讓嶺大學生參與滅罪推廣工作，既學習又能服務社會，一舉兩得！。

睇返「裸聊」案近年持續上升，前年全年只有60宗，舊年已經急升到477宗，受害者當中一成係學生。

真的希望大家睇完呢條短片，會了解多啲「裸聊」騙局，唔會再有咁多人付出「裸的代價」啦！

Jack

** 博客文章文責自負,不代表本公司立場 **

好快就到中秋節，「人月兩團圓」，但大家喺慶祝時，有無諗過社會上仲有好多人需要關心呢？

Jack 知道好多非政府機構，都會喺中秋節舉辦活動，好似救世軍就搞咗個「心好月圓」行動，職員同埋義工會向獨居長者、基層家庭和露宿者派發月餅，又會舉辦70多項活動，同佢哋歡度中秋。

救世軍提供照片

同救世軍公關傾起，呢個「心好月圓」中秋行動已經舉辦咗20幾年，預計今年會有超過一萬六千人參與，當中四分三左右係獨居或者住喺院舍嘅長者。

Jack 對月餅無咩興趣，但身邊好多朋友都會收到太多月餅，食都食唔晒，咁就可以捐俾救世軍，等佢哋送俾呢班長者、殘障人士、低收入家庭同無家者，增添暖意。

大家可以喺下個月五號或之前，將月餅送去救世軍全港31個收集站，好讓義工同職員趕得切喺中秋佳節前，將月餅贈予有需要人士手中，等佢哋得到溫暖同埋關心。