再建冰室

潮流興拍微電影，好似上次Jack就介紹過一套，教大家避免跌入「裸聊」的微電影。但製作微電影並非後生仔專利，連一班「老友記」亦一樣玩得投入。

長者安居協會提供

Jack最近收到邀請，出席一個微電影首映禮，呢套微電影叫做《再建冰室》，係由一班退晒休的老友記，自編自演。

佢哋係參加咗長者安居協會嘅「仍然有夢想」計劃來「追夢」，佢哋包辦編、導、演同剪接，用咗足足五個月拍攝，非常認真！

呢套約十五分鐘長的微電影，講述主角「陳永仁」的冰室，面臨搬遷危機，一班街坊諗盡辦法，希望保留呢個聚腳地。

長者安居協會提供

 

聽講故事入面仲有好多不同造型、性格的角色，充分展現老友記精靈、活躍、醒目的一面！

長者安居協會仲特登為呢套微電影，喺呢個月中搞咗個首映禮，反應聽講好好，啲門票全部派晒囉！ 大家又唔駛失望，因為協會遲啲會將套戲放上網，等更多人欣賞到！

長者安居協會提供

Jack覺得呢個活動認真有意義，我哋成日話要有「夢想」，但多數都係講緊小朋友，又或者年青人，但諗深一層，老友記們從忙碌的工作前線退下，享受人生之餘，亦能繼續發熱發光，追逐年青時為家庭、為工作，而被迫放下的夢想。

當老友記們回看這一生，能夠活得精彩無憾，相信亦會很開心。

Jack

** 博客文章文責自負,不代表本公司立場 **

「裸聊」案愈來愈多，唔少青年人貪刺激，結果墮入陷阱，警方今年頭七個月就接到375宗「裸聊」勒索案，涉及損失百幾萬。

為咗提醒市民，尤其是青年人小心「裸聊」騙局，屯門警區聯同嶺南大學，拍咗一段名為「裸的代價」的微電影，將裸聊勒索手法同防罪貼士，送給大家。

視頻截圖

呢段片由七位嶺大「罪案與青少年犯罪」學科的學生製作，Jack睇過覺得好有趣，故事講到一名學生墮入越南少女的「裸聊」陷阱，結果被一而再、再而三勒索。

呢班後生仔捨棄說教，反而喺故事同對白，引入年青少年熱門話題同「潮語」，雖然製作水平或能不及專業製作，但相信年青人會更加「受落」。

嶺南大學網頁照片

故事結尾係點？Jack留返俾大家自己睇，但據講佢哋去過中學播放，反應都唔錯！條片最近仲放埋上網添！

屯門警區警民關係組過去幾年，都與嶺大服務研習處合作，推出十幾個項目，讓嶺大學生參與滅罪推廣工作，既學習又能服務社會，一舉兩得！。

睇返「裸聊」案近年持續上升，前年全年只有60宗，舊年已經急升到477宗，受害者當中一成係學生。

真的希望大家睇完呢條短片，會了解多啲「裸聊」騙局，唔會再有咁多人付出「裸的代價」啦！