香港外國記者協會（FCC）因為俾香港民族黨召集人陳浩天開壇講港獨，惹起掀然大波，外界一直叫政府或FCC公開租約，政府昨晚終於公開FCC會址租契，當中訂明該會以每月55萬元租下會址，租期由2016年1月1日至2023年1月1日。簽署日期為2015年12月29日，政府一方由產業署一名總產業經理，在時任特首梁振英(CY)的授權下，負責簽訂租契。
梁振英最近狙擊FCC俾平台陳浩天宣揚「港獨」咬住唔好，有評論即刻攞住租約來反擊CY，暗示喺佢同意續租俾FCC。
CY在facebook發文反擊。
CY今日中午過後在其facebook專頁發文，指如果當年FCC搞『港獨』午餐會，特區政府不會續租。他貼文說：有傳媒問：為什麼在我任內，特區政府將會址續租給FCC？答案很簡單：如果當年FCC請人宣揚『港獨』，我肯定不會同意續租。」
Ariel問過政府中人，話這些租約列咗「行政長官」授權下續租，其實都係政府產業署租約或文件的標準安排，等如你收到稅務局封信係稅務局局長俾你一樣，現實上只是一個評稅主任處理。
據悉，當年行政會議並沒有討論過FCC的租約，時任特首的CY亦無參與決定。過去政府一直出租有關物業俾FCC，租約由產業署處理，產業署按慣常做法，快到期同FCC傾咗，訂立租契，交俾相關的政策局睇睇，政策局每日都會處理不少這樣的文件，多數都按慣常做法處理，都唔知有無到常秘那一層去決定。反正一般無事，就按一般程序流水作業處理。
租約條文列明不能違法。
高人話今次公開租契，第一波反應是有心人將焦點射向CY，想轉移公眾對租約條文的注意。不過，細心睇番租約，首先講明出租物業不能用作「不合法或不合道德」的用途，而且由業主即政府決定什麼是不合法或不合道德」，即係話政府講咗就無得上訴。
租約條文列明政府不滿意可以三個月通知不續租。
另一段講明若業主即政府對場地的使用不滿意，可以給予三個月的通知收回場地，不予賠償。
即係話，如果政府覺得FCC搞場午餐會，俾陳浩天宣掦港獨係違法，固然可以收番個場，即使單單係不滿意FCC搞嘢的方式，亦可以按租約3個月通知收番個場，當然係咪要出到呢招，就要睇政府中人覺得俾FCC搞落去有無問題啦。
Ariel
** 博客文章文責自負,不代表本公司立場 **
