山竹遠離本港後，星期一的交通大混亂繼續係話題。特首林鄭今早出席行會前，繼續撐不叫停工的決定，話沒有方案考慮全面停工，亦無機制評估停工帶來的法律後果，強調她透過向僱主呼籲是有效方法。
林鄭的Facebook專頁好多「嬲嬲」
被問到點睇有兩萬個網民在她的Facebook專頁俾「嬲嬲」，林鄭話，對於有巿民覺得政府做得不足，已表明政府會繼續努力，指自己「完全可以體會得到」。
這幅惡搞照相信林鄭都睇過
原來她也睇過惡搞的相和短片，話自己完全可以體會巿民因為要在鐵路站等待多時、感到很徬徨，不知道有車還是無車搭的情況下，而感到很憤怒和不滿。佢跟著講：「咁所以喺咁的情形之下，攞特首嚟出吓氣，係無問題既，特首係可以俾人鬧嘅，但你話係咪因為咁而去做一啲無法律基礎、無做過對香港社會各行各業評估，亦唔知跟住後果係點樣的決定呢，恐怕呢個就唔係我認為行政長官一個負責任的做法，希望大家明白」。
政壇八卦友話，呢句「用特首出氣無問題」，都可以睇到林鄭有啲勞氣喎。但佢將市民對政府當日表達的不滿，好簡單地理解為搵佢出氣，又好似將對政府安排不善的合理批評，扭曲變成純粹意氣用事的發洩。
無論如何，政府都做咗啲嘢去善後，搵咗保安局局長李家超領導跨部門小組，檢視應對颱風的善後工作，期望10月召開首次會議。但八卦友又問嘢，點解係李家超呢? 善後最大問題係交通，點解唔見咗運輸及房屋局長陳帆呢? 要檢討為何不找政務司司長張建宗主理，咁咪可以睇晒各方面的問題囉。
Ariel
** 博客文章文責自負,不代表本公司立場 **
山竹過後，交通大混亂，住新界的打工仔閒閒哋花兩、三個鐘頭先逼到返公司，引來泛民、建制政客齊批政府處理有問題。
今日報章有不少引述政府的角度看這次事件，有傳媒引述官府中人解釋，政府今次其實早已就山竹善後工作作出部署，否則昨天就不能出動了一萬五千人進行各種善後工作等等……只是今次「山竹」威力太大，尤其是東鐵綫的問題嚴重，港鐵在資訊通報方面又未有做足，加上各大巴士車廠外都有嚴重塌樹，令巴士公司未能順利出車，以至出現局部地區的交通癱瘓。
而昨日運輸署署長陳美寶匯報最新情況時，亦特別指出「今次主要擠塞在於東鐵綫有大量人潮，當局已督促港鐵管理層做好控制人潮的工作。」
有港鐵的前線員工睇到這些解釋，覺得政府統籌問題變成港鐵問題，覺得好無奈，大呻佢哋已經好努力，政府有關部門好清楚，在8號波下，露天的路段都會停駛，根據安全守則，8號波或更高風球下，佢哋前線員工亦不能到戶外檢查架空電纜的損毀情況。
據悉當天港鐵中人睇到個風吹得咁勁，都預料到架空電纜受損情況一定好嚴重，在天文台轉8號波後，佢哋已經側側膞，在安全情況下開始檢查及評估損毀情況，但要實地檢查架空電纜損毀成點及進行搶修，就一定要等到8號風球除下，睇番天文台在周一清晨5點20分先改發三號風球。只要有常識的交通業界都估到，東鐵綫好難可以全線恢復正常運作，港府相關部門亦應該好掌握東鐵綫的情況。
還有一個情況係，周一九巴日間幾乎全線停駛，平日住新界坐巴士出九龍的市民自然都會轉而坐東鐵，在東鐵綫未完全回復正常，而乘客反而增多的情況下，點會唔逼爆造成大混亂。港鐵中人唔明點解政府部門會評估唔到，依家逼爆的係東鐵綫，佢哋都要硬食。港鐵已做到盡，仍然慘成替罪羊。
