小鯊早兩日話咗東周事件大家食花生唔怕滯的話,將會陸續有嚟,結果人稱炒何的星島集團主席何柱國又出招,今日星島又有文章大爆,當日東週為何出聲明感謝特首林鄭。
星島架勢堂專欄話睇到東周刊發聲明「衷心感謝特首訓話」,見個聲明咁蕩氣迥腸,去八吓發生乜事。聽聞東周編輯部同仁當日聽完特首訓話,有少少唔開心,因為特首話對佢地的專業品質,還需拭目以待,就覺得特首揶揄東周。
文章指後來東周編輯部同仁和老闆何柱國開會。何生笑笑口咁話,「你哋班東周老總,聽到特首咁講,有無感到溫暖呀?」班東周老總搭唔到咀。
何生就繼續話,「你哋水平低,特首水平高,唔明白人地關心你。香港已經到第四任特首,前三任特首都無咁關懷東周,到呢一個零舍關心,你哋應該與有榮焉。你又唔見特首關懷其他二週刊、三週刊?」
何生話:「人地特首好多正經事要做,邊度咁鬼得閒揶揄你地一本週刊? 特首咁講係關懷你哋,鼓勵你哋,你哋應該感到溫暖,晚上瞓覺都應該瞓得開心啲,瞓到半夜都識哈哈笑。」(哈哈笑用咗紅色字加大號字體,隔住張報紙都似乎聽到笑聲)
文章指何生講完,班東周同事馬上起哄,有人提起,人稱特首係「奶媽」,其實佢直頭等如阿媽,咁有心到處去關心人,雖然剛過去的是中秋節,唔係母親節,大家都忍唔住要講兩句:「誰言寸草心,報得三春暉。」所以東周就特別草擬一個小聲明,用嚟感謝特首的無限關愛云云。
蠢蠢地如小鯊,都覺得嗒落有骨喎。特首對東周訓話,招來炒何連番「感謝」,呢單嘢花生指數爆晒燈呀。
小鯊
** 博客文章文責自負,不代表本公司立場 **