學生組織有部署預演佔中

學聯的罷課集會演變成同警方衝突，互相推撞、胡椒噴霧等等，到底成件事係點樣發生呢？

有在現場目擊者同Ariel講，罷課集會十點半接近尾聲，現場人士仲一度以為散場準備離開，但學民思潮的黃之鋒等人上台講話，呼籲在場人士衝入公民廣場(政府總部廣場)，之後大約有近百名的集會人士，分成兩批，一批衝擊政總廣場，有人爬過圍欄，闖入廣場，其他人就通過閘口衝入廣場。另外有一批示威者就衝到立法會，並佔據立法會同政府總部通道。

他們部署同時從添美道及立法會兩個方向，衝擊政總兩邊入口，分散警力，令部份人成功突圍進佔政總廣場。

發生衝入事件後，大批警員迅速增援，開始抬走部分示威者，防止示威者衝入政府總部，期間警方施放胡椒噴霧，出現大混亂，多人受傷。

到底，學生係咪有計劃衝入政總廣場呢，學民思潮的周庭今早在電台節目話，行動是學民思潮同學聯商討出來，昨晚學聯常委梁麗幗亦表示，衝入廣場的行動，是計劃之一，因為日前到禮賓府抗議，特首梁振英不願對話。亦有傳媒引述學聯秘書長周永康話，呢次係為正式佔中做準備。

Ariel

** 博客文章文責自負,不代表本公司立場 **

講吓講吓，立法會又快開鑼，暑假期間爆出議員涉收取肥佬黎捐款未申報事件，立法會議員個人利益監察委員會，十月六日就會開會處理接獲的投訴。

據聞被投訴的議員，包括長毛、李卓人、梁家傑、毛孟靜同涂謹申已向委員會作出回應，又交咗相關文件俾委員會參考，至於委員會是否展開調查，就要睇開會時點決定。

知情人士對 Ariel話，呢個委員主席係民建聯的葉國謙，委員三個泛民，三個建制，投起票來，好大機會五五波，三票贊成查，三票反對查，如果要主席投埋一份，唔好以為阿謙係建制派就可以多一票，查硬佢哋，相反，按照議會傳統，為咗保障議員免被亂查，主席會投反對票。

如此說來，議員個人利益監察委員會好大機會決定唔查，但件事未完。首先要睇公眾反應，是否就此收貨，還是認為議員護短。若然民意反嚮大，議員仲可以在立法會大會提出用權力及特權法去查，有資深議員仲話，監察委員會調查係閉門，特權法查仲會公開聆訊。至於建制派會唔會在查議員方面放水唔贊成用特權法? 呢個資深議員話，佢唔覺得建制派今次會唔贊成查。

睇嚟捐款門事件，仲可能在議會發酵噃。