講吓講吓,立法會又快開鑼,暑假期間爆出議員涉收取肥佬黎捐款未申報事件,立法會議員個人利益監察委員會,十月六日就會開會處理接獲的投訴。
據聞被投訴的議員,包括長毛、李卓人、梁家傑、毛孟靜同涂謹申已向委員會作出回應,又交咗相關文件俾委員會參考,至於委員會是否展開調查,就要睇開會時點決定。
知情人士對 Ariel話,呢個委員主席係民建聯的葉國謙,委員三個泛民,三個建制,投起票來,好大機會五五波,三票贊成查,三票反對查,如果要主席投埋一份,唔好以為阿謙係建制派就可以多一票,查硬佢哋,相反,按照議會傳統,為咗保障議員免被亂查,主席會投反對票。
如此說來,議員個人利益監察委員會好大機會決定唔查,但件事未完。首先要睇公眾反應,是否就此收貨,還是認為議員護短。若然民意反嚮大,議員仲可以在立法會大會提出用權力及特權法去查,有資深議員仲話,監察委員會調查係閉門,特權法查仲會公開聆訊。至於建制派會唔會在查議員方面放水唔贊成用特權法? 呢個資深議員話,佢唔覺得建制派今次會唔贊成查。
睇嚟捐款門事件,仲可能在議會發酵噃。
Ariel
** 博客文章文責自負,不代表本公司立場 **