政事
蘋果日報被佔中人士示威封路，發行報紙大受影響。昨日以保護新聞自由為理由，成功向法庭申請禁制令，禁止人們阻塞它們的通路。
昨晚繼續有大批人士到蘋果日報將軍澳廠房外請願，到深夜時蘋果的律師到場，向示威者派禁制令，但絕大多數示威者都拒絕接收，變成你有你派令，佢有佢示威，客觀上「送達」禁令的程序無法成功。
那班示威者唔理禁令，似按既定計劃行動，一晚比一晚升溫，前晚在蘋果廠房門口阻到4點走人，出完禁制令，今早凌晨更阻到5點幾才收工，蘋果日報發行更大鑊，比正常遲5個鐘才出街，完全錯過晒返工賣報紙的黃金時間。
蘋果出禁制令呢招無乜用，愈禁愈遲。反佔中示威者學足包圍政總者那招，要驗過貨才俾運走。蘋果為都市日報和信報印刷，示威者驗完見到唔係蘋果都會放行，但這兩份報紙都已經媽媽聲，話被拖累遲晒出街。
示威者阻住蘋果運紙發行，的確唔啱。問題係而家興講公民抗命，政府想幫政總開路都未開到，咁又點樣幫蘋果開路呢？
Ariel
** 博客文章文責自負,不代表本公司立場 **
滙豐前亞太區主席艾爾敦上日在個人網誌中發表題為《香港的光明、黑暗和未來前景》評論，指行政長官梁振英涉及收取海外公司款項，已觸動中央領導層神經，可能被北京要求下台，佢又話如果梁振英確被要求請辭，短期內替任人選可能是較受歡迎的政務司司長林鄭月娥。
消息一出，昨早上Ariel都收到幾個電話，問係唔係北京有此意圖。Ariel話北京有何意圖，無理由經一個退休英國銀行家放出街啫，又睇唔到一個外國退休人士點知道北京高層的意圖喎。
後來和一個政壇高人討論此事，佢話先不論艾爾敦知唔知，而係點解要咁講。佢同艾爾敦都熟，話艾爾敦一向低調，平時都好少公開講嘢，在呢啲敏感時刻，仲要講呢啲，真係怪到唔怪。高人話艾爾敦出來講嘢，人家第一個感覺覺得同滙控有關，另外佢係某大會計師行顧問，人家第二個感覺會同呢間會計師行有關，間會計師行在內地有一萬個員工，都真係有啲滴汗。表面睇唔知艾爾敦點解咁做。
高人相信人人都有個老細，都係艾爾敦個老細叫佢出來講嘢架啦。佢個上帝係邊個，無人知喎。
後來昨日滙控急急發聲明，話艾爾敦有關本港政局的言論，是以個人名義發表，不代表集團意見。從艾爾敦事件可見，都有唔少人想放暗器射阿CY喎。
