政事
政府又話想和學聯重啟對話，政制及內地事務局局長譚志源仲話，政務司司長林鄭已搵到一個「德高望重」的中間人，冀透過中間人與學聯醞釀重啟對話，傳聞該中間人可能是中大校長沈祖堯。
沈校長好有心，想做中間人，都係半公開的秘密。聞說9．28之後，林鄭馬上約8大校長見面，希望他們勸學生回校，但8大校長當時怕做醜人，表示事件再惡化再算。
後來僵局惡化，沈校長就做中間人，拉攏學生和政府對話。當時有不止一個中間人，鼓勵政府同學生傾，他們不約而同地向政府提出，話學生都想退，但要有一個下台階，問政府可以俾到什麼下台階。傳聞沈校長提過，叫政府再交政改報告，建議重定提名委員會的組成，希望學生可以收貨回家。但這涉及人大常委會的決議內容，特區政府深明中央不肯改變，覺得此建議無法接受。
如今雙方都有少少意願重啟對話，但真正問題是對話能有何種成果，若然大家有機會傾出成果，自然愈早對話愈好，但若果只係傾傾無結果，對完話做場騷又反枱，呢啲對話是否有利於和解，的確是一個問題。
Ariel
** 博客文章文責自負,不代表本公司立場 **
路透社昨日爆出中央最高層對佔中的態度，知情人士話有啲料到。
路透社話，國家主席習近平月初主持國家安全委員會會議，提到特區政府與示威者對話，已是讓步，強調普選涉及主權問題，中央不會繼2003年23條立法及2012年國民教育事件後，再作第三次讓步，否則先例一開，抗爭活動可能蔓延到內地，引起骨牌反應，西藏、新疆以及其他省區都可能相繼要求選舉權利。
報道又話，中央認為若佔領持續，受損害的是香港，不是內地。中央政府支持特區政府依法施政，亦支持警方執法。除非事態嚴重失控，例如出現殺人、縱火、搶掠等，否則不會出動駐港解放軍。
Ariel四圍八咗吓，熟悉北京政壇高人話都收到風，阿爺定咗調，希望在唔流血的情況下清場，唔會輕言出動解放軍。本來本地局面亦開始趨向平靜，點知前晚出現咗一班人落佔領區搭竹棚，迅速到無人有，到昨日上午警方清完金鐘道，晚上又有人調兵去圍龍和道，非常之有組織。
高人好奇怪，唔通有啲人知道阿爺立場想唔流血，就將行動升級，同差人硬踫，力求逼到擦槍走火，你唔想流血都逼到你流血。
之前都唔少人強調香港唔係搞顏色革命，唔係要推翻政權，但有啲有心人咁樣搞落去，事態好易失控，硬要逼出流血。到時影到一張解放軍操入中環的相，上晒國際媒體頭條，會唔會係搞局者的目標呢？
