有組織 玩大佢!

Ariel昨日寫到中央定出「不流血不搶掠不出解放軍」的方針，盡量想俾香港空間自己平息事件，但樹欲靜而風不息，連續兩日都有人想搞大件事，唔似係巧合咁簡單。

首先係旺角，有人運幾百枝竹去搭棚，最後都係在場示威者唔同意，先至拆番走，真係咁容易有人咁民主運竹棚去支持佔中?

再睇龍和道，昨晚有亂事，同樣有部署。Ariel前日中午收到佔龍和道的短訊，結果前晚有人搶路。Ariel昨晚又收到叫人到處佔路的圖片，是論壇留言的Cap圖，網上有人四處傳去發動，留言話「以150人為一組，多處打遊擊，例如重奪金鐘道，龍和道，堵塞中環各道路，甚至佐敦裕華，目的係令警方壓力爆煲，再出招打人，等佢地行錯棋，搶民意令更多人肯再出番嚟，希望頂到星期5。」

我收到呢個訊息時，各處未有示威，後來先有中環有人出來設路障佔馬路，到半夜龍和道又出事。呢個網上流傳的動員劇本，大體上發生咗。

高人話，呢啲人明顯想玩大佢，不止想發動更多人上街，而係想爆煲，想出事，想亂。一般示威者如果唔認同呢啲暴力行為，就唔好嚮應。警察亦要沉住氣，若壓力爆煲打人，受害最大的是自己。

Ariel

** 博客文章文責自負,不代表本公司立場 **

政府又話想和學聯重啟對話，政制及內地事務局局長譚志源仲話，政務司司長林鄭已搵到一個「德高望重」的中間人，冀透過中間人與學聯醞釀重啟對話，傳聞該中間人可能是中大校長沈祖堯。

沈校長好有心，想做中間人，都係半公開的秘密。聞說9．28之後，林鄭馬上約8大校長見面，希望他們勸學生回校，但8大校長當時怕做醜人，表示事件再惡化再算。

後來僵局惡化，沈校長就做中間人，拉攏學生和政府對話。當時有不止一個中間人，鼓勵政府同學生傾，他們不約而同地向政府提出，話學生都想退，但要有一個下台階，問政府可以俾到什麼下台階。傳聞沈校長提過，叫政府再交政改報告，建議重定提名委員會的組成，希望學生可以收貨回家。但這涉及人大常委會的決議內容，特區政府深明中央不肯改變，覺得此建議無法接受。

如今雙方都有少少意願重啟對話，但真正問題是對話能有何種成果，若然大家有機會傾出成果，自然愈早對話愈好，但若果只係傾傾無結果，對完話做場騷又反枱，呢啲對話是否有利於和解，的確是一個問題。