今早報館收到匿名電郵，大爆佔中三子、特別是戴耀廷和鍾庭耀的內幕。爆料者自稱是「一個愛大學的學者」，當然真實身份不明，但行文處處針對這些人的「學者」身份。
爆料者直指「有些人在學術上未成功，寫不出學刊接受的論文，就搞起民調中心，搞出佔中運動，結果就成了名，出了位，萬眾注目，登上他人生的高峰，卻賠上了學生，賠上了大學，賠上了香港，所有人為他們的出位言行付出慘痛的代價。」
爆料者特別針對戴耀廷向港大幾個相關院系先後捐了80萬、30萬、20萬和10萬（實為15萬）捐款，指他堅持捐款匿名，又用大學出糧的員工做佔中工作，他又懷疑鍾庭耀誇大6.22公投的投票數字等。
由於爆料內容涉及大量電郵，記者翻查也查到頭痛，而戴耀廷卻聲稱他開會中，未有具體回應。
Ariel睇表面證據，也覺得有點可疑，若是光明正大的資金來源，實際上又無必要這樣盡量匿名處理。而戴耀廷又點解有這麼多錢去搞佔中，又真係唔明。佢當初話只接受1萬元以下捐款，以免被大額捐款者操控，但從內幕資料看，他的確水頭充足，錢從何來，惹人疑竇。
Ariel
** 博客文章文責自負,不代表本公司立場 **
佔中運動搞的廣場公投，上周嗱嗱臨話搞，跟住去到星期日，就突然死亡，從搞公投意念開始到死亡，大家都被佢搞到眼花撩亂，唔知發生咩事。Ariel嘗試搵相關人士索吓料，睇吓搞邊科。
話說呢個公投意念發起人，應該主要係佔中三子之一的戴耀廷，佢諗咗之後，搵埋學聯同學民思潮，就將概念醞釀起來，佢哋初期打的如意算盤係咁，搞咗一、兩個相對溫和的公投議題，例如叫民情報告要有效用等等，希望搞出一個網上公投，而呢個網上公投人數最好有二十萬人，足夠地大，然後就攞住呢個籌碼就順手退場。
但呢個只係如意算盤，操作起上來就唔係咁簡單，由戴耀廷到學聯、學民思潮，一齊度呢個意念，到呢樣嘢見光後，周五就發生劇烈變化，一啲比較激進的人士參與討論，覺得本來兩個公投題目，係一種阿媽係女人的建議，無乜用啦，要改得勁啲，例如人大要改變8‧31的決定，又例如要加入公民提名，有番咁激的題材，搞出大量的支持，廣場公投先有意義，在激進人士推吓推吓之下，上周五公投議題就變咗呢兩個相當強硬的題材啦。
成件事搞幾搞就晒質，明眼人都睇到咁搞落去都係一鑊泡，首先在佔領區的群眾，特別係旺角的人群相當反對，覺得搞呢啲公投無意思，6‧22時已搞過呢啲公投，當時已搞過咁大規模，再搞呢啲咁細規模，做乜呢？！另外，想退場的泛民，亦都覺得相當頭痕，本來題材不慍不火仲可以，搞到咁激，立場變得咁僵硬，根本無辦法退場。
而戴耀廷同學聯、學民見街外反應咁差，亦都好擔心，硬著頭皮搞落去，除咗話冇廿萬人投票之外，仲好擔心投票率好低，變成搬石頭砸自己的腳，幾經商議，決定臨時吹雞，結束廣場公投。
成件事由提出、變質到擱置，都顯得有啲兒戲，反映咗由戴耀廷同埋學聯、學民帶領呢場運動，其實當中有相當大的隨意性，可以見到佢哋完全操控唔到參與的人群。雖然最後階段擱置咗公投，但即使喺旁邊睇都為佢哋抹一把汗。
