有驚無險清中信障礙物

千呼萬喚，法庭就金鐘中信大廈同旺角佔領區頒咗臨時禁制令，但「執達主任幾時做嘢先？」搞咗半個月，場戲今早終於上演。

大約二十個執達主任朝早9點半左右到達中信大廈，有執達主任用大聲公宣讀禁制令，內容都係要求佔領人士搬走阻塞大廈出入口、添美道及龍匯道的障礙物，如果有人阻住做嘢，就可能藐視法庭，附近「傍住」的警員可以介入。

到10點鐘鬆啲，執達主任開始郁手清理障礙物，先拆除龍匯道的鐵馬陣，現場的佔領人士都好和平，有啲仲係自行搬走鐵馬。立法會職員亦趁機攞番原來屬於立法會的鐵馬。

但當執達主任清除添美道及龍匯道交界迴旋處的鐵馬時，就出現波折喇。學聯成員張秀賢、學民思潮召集人黃之鋒、民主黨何俊仁等人，質疑執達主任想清除不阻交通的佔領區，超出禁制令範圍。佔領人士更一度包圍執達主任，要求解釋折除添美道路障的原因，執達主任要由警員護送返回中信大廈，佔領者亦跟隨進入大廈，現場一度混亂。

黃之鋒同記者講，無預計中信的禁制令會清除整條添美道，「呢個係中信大廈外面的禁制令，而唔係整條添美道的禁制令，我地希望公眾清楚明白，我地係絕對唔同意執達吏今日的做法。」

一輪擾攘後，執達主任去到龍匯道東行線馬路清除鐵馬陣，就無遇到反抗。搞掂龍匯道後，執達主任就鳴金收兵，而警方下午亦成功重開龍匯道車路。

睇落執達主任今朝在中信外拆路障都尚算順利，原本喺中信外的佔領者可以撤去立法會同政府總部外的夏慤道繼續留守，反應唔大都算係意料之中。但之後要去比較混雜的旺角佔領區，一來示威者無地方可撤，二來上次警方清路後都有經驗，晚上即刻有番近萬人出來，仲會唔會好似中信咁和平呢？Ariel就聽聞政府中人都估計，佔領區都係清吓又佔番，佔番又清吓，普通市民都要預咗跟住落嚟都係咁俺悶的清清佔佔場面啦。

Ariel

** 博客文章文責自負,不代表本公司立場 **

港大民研計劃發布香港巿民最熟悉的政治人物排名榜，特首CY、政務司司長林鄭和長毛梁國雄排頭三位。田北俊就由排24跳升到第8位。呢個榜是被訪者在沒有提示下說出的政治人物計，用以量度政治人物知名度，和支持度無關。

上次調查調查在今年4月進行，那次調查排熟悉度榜首的長毛，今次跌落第三位。上次CY排第三，今次升上第一，上次林鄭排第7，今次升上第二。(詳細排名見民意網站http://hkupop.hku.hk/chinese/release/release1200.html)

田少大升最惹人注目，平情而論，田少被阿爺搣柴事件，本來非常負面，但佢好懂得做公關，出來來好像笑風生，滿不在乎，不但令他知名度大增，還在公眾感覺上加分。可惜玩完呢鑊，阿爺都唔預田少再玩，佢熟悉度高咗都無用啦。

CY超越長毛成為最熟悉人物，他作為特首，熟悉度低過長毛先至有問題，而家叫做正常番少少。反而長毛在今次佔領運動中無扮演激進出位的角度，被學聯等小朋友搶去了鋒頭。

不過林鄭也值得留意，她作為政務司司長，過去形象未夠突出。但這次和學聯學生辯論，電視直播，入晒屋，林鄭淡定應對，起碼令更多人熟悉這位司長了。

不要以為熟悉度無用，做政客無人識，不如死咗佢好過咯。