王維基的港視今日網上開台，選擇早上6點點播睇劇，表面上是爭取上班一族早上收看，但原來港視的系統暫時只能夠容納40萬觀眾同時收睇，怕逼在晚上一齊睇會爆廠。
港視今晚8點網上啟播，先播半小時開台禮，之後就播《警界線》及《選戰》兩個主打劇。以後港視周一至周五晚8點開始直播共6小時的新節目，包括一小時自製劇、兩小時韓劇、一小時日本動漫及兩小時購物節目，隨後會不斷重播，不過觀眾每早6點可透過點播功能，先收看晚上直播的6小時新節目。
不過原來這個「早上睇」的功能，主要想分流觀眾。港視選用思科Nexus的交換器在網上播放，王維基話，按照目前的容量，最多可容納40萬用家透過不同電子裝置同步收看，為免用戶過多造成塞車或「窒機」，它們設定的用戶量超過40萬，超過此數時，港視將拒絕新來用戶加入，超額客戶須輪候至有剩餘頻寬時，才能載入收看畫面，建議觀眾可於不同時段或不同電子裝置收看港視。
港視這個做法很易塞車，以早上時段為例，大多數人7點零8點出門口，見有新嘢宣傳得咁勁，搭車時一齊點入去睇睇，初時好易過40萬，但一過額就要等，下次就唔嚟。正常嚟講，除非節目超吸引，否則初時有40萬客，最後留到10萬客都唔錯。即係你想有40萬客，初時容量最好有160萬。還要注意睇廣播電視一部電視機可以有兩三個人睇，但手機板腦睇只得1個人睇，得10萬客就只有10萬人睇，以6萬幾人一個收視點，若然只有10萬人睇，2個點都唔夠，唔可以同無線過百萬的收視去爭。只有1、20萬人睇的話，同蘋果動新聞的瀏覧量差不多，只是同蘋果爭。
呢個世界乜都講錢，魔童唔敢提供同時過100萬的容量，顯示佢自己都相當窒步喎。
Ariel
** 博客文章文責自負,不代表本公司立場 **
千呼萬喚，法庭就金鐘中信大廈同旺角佔領區頒咗臨時禁制令，但「執達主任幾時做嘢先？」搞咗半個月，場戲今早終於上演。
大約二十個執達主任朝早9點半左右到達中信大廈，有執達主任用大聲公宣讀禁制令，內容都係要求佔領人士搬走阻塞大廈出入口、添美道及龍匯道的障礙物，如果有人阻住做嘢，就可能藐視法庭，附近「傍住」的警員可以介入。
到10點鐘鬆啲，執達主任開始郁手清理障礙物，先拆除龍匯道的鐵馬陣，現場的佔領人士都好和平，有啲仲係自行搬走鐵馬。立法會職員亦趁機攞番原來屬於立法會的鐵馬。
但當執達主任清除添美道及龍匯道交界迴旋處的鐵馬時，就出現波折喇。學聯成員張秀賢、學民思潮召集人黃之鋒、民主黨何俊仁等人，質疑執達主任想清除不阻交通的佔領區，超出禁制令範圍。佔領人士更一度包圍執達主任，要求解釋折除添美道路障的原因，執達主任要由警員護送返回中信大廈，佔領者亦跟隨進入大廈，現場一度混亂。
黃之鋒同記者講，無預計中信的禁制令會清除整條添美道，「呢個係中信大廈外面的禁制令，而唔係整條添美道的禁制令，我地希望公眾清楚明白，我地係絕對唔同意執達吏今日的做法。」
一輪擾攘後，執達主任去到龍匯道東行線馬路清除鐵馬陣，就無遇到反抗。搞掂龍匯道後，執達主任就鳴金收兵，而警方下午亦成功重開龍匯道車路。
睇落執達主任今朝在中信外拆路障都尚算順利，原本喺中信外的佔領者可以撤去立法會同政府總部外的夏慤道繼續留守，反應唔大都算係意料之中。但之後要去比較混雜的旺角佔領區，一來示威者無地方可撤，二來上次警方清路後都有經驗，晚上即刻有番近萬人出來，仲會唔會好似中信咁和平呢？Ariel就聽聞政府中人都估計，佔領區都係清吓又佔番，佔番又清吓，普通市民都要預咗跟住落嚟都係咁俺悶的清清佔佔場面啦。
