港視靠悲情牌唔掂

籌備多年，一波多折的香港電視，終於正式「開台」，主席王維基話至下午1時有25萬用戶睇過港視的節目，如果以電視台的每點6萬幾收視，應該有4點，開台日收視好過亞記以倍數計喎。

另外維基又透露已有33萬部智能電視，可睇港視直播，有67萬部裝置，下載他們的應用程式，兩者加上合共是100萬。出席開台禮的政府官員商務及經濟發展局局長蘇錦樑都幾高興吓，仲透露在67萬下載，佢佔咗5個，包括在兩部手機、兩部平板電腦和屋企的智能電視。佢咁講唔知攞景定贈慶，咪即係話港視67萬唔係全部都係不同用戶囉，廣告商落廣告時，條數會點計呢？

維基在開台禮上，繼續行感性路線，話無論幾黑暗，總有辦法走過去，又延續不獲免費牌照時的悲情牌，重申阻撓港視發牌只有一個人，矛頭似又指向番CY噃，繼續咁打悲情牌真係咁有效？

維基開台，當然係益咗廣大網民同電視觀眾啦，不過Ariel搵業內資深人士傾傾，計吓條數，港視前路真係唔易行。港視每日播六小時新節目，周一至周五都有自拍劇，即使每日播一集，一年就要有265集的自拍劇先夠，一集的製作費，維基話要成100萬，咁一年淨係劇集製作費用都要成2億6千幾萬喎，加埋外購劇同其他支援費用，燈油火爉，一年睇怕都要4億開支才落到樓。

計完開支，就睇點收番成本啦，依家在香港的廣告界眼中，網媒仍然係小眾，TVB將所有劇集放上網，加埋新聞頻道等等，網上一年收益1億港元。強如TVB都只係得1億，港視似乎短期內攞到億元計的網上廣告收入唔係咁易喎。

據知情人士話，維基都有諗過最理想賣埠可以頂到開支，收到廣告就賺，所謂賣埠點計？三分一收入來自東南亞賣片，三分一來自內地賣片，另外三分之就係靠劇集喺內地播谷紅自己的星，在內地拍廣告等，港視抽佣都幾和味。不過，依家維基同阿爺的關係，唔好話劇集在內地播出的希望不太，連帶啲星喺內地發展都會受影響。

港視條路唔易行，希望維基發揮佢靈活的頭腦，快快為港視搵到超前的發展路向，等觀眾欣賞多啲好節目啦。

Ariel

** 博客文章文責自負,不代表本公司立場 **

王維基的港視今日網上開台，選擇早上6點點播睇劇，表面上是爭取上班一族早上收看，但原來港視的系統暫時只能夠容納40萬觀眾同時收睇，怕逼在晚上一齊睇會爆廠。

港視今晚8點網上啟播，先播半小時開台禮，之後就播《警界線》及《選戰》兩個主打劇。以後港視周一至周五晚8點開始直播共6小時的新節目，包括一小時自製劇、兩小時韓劇、一小時日本動漫及兩小時購物節目，隨後會不斷重播，不過觀眾每早6點可透過點播功能，先收看晚上直播的6小時新節目。

不過原來這個「早上睇」的功能，主要想分流觀眾。港視選用思科Nexus的交換器在網上播放，王維基話，按照目前的容量，最多可容納40萬用家透過不同電子裝置同步收看，為免用戶過多造成塞車或「窒機」，它們設定的用戶量超過40萬，超過此數時，港視將拒絕新來用戶加入，超額客戶須輪候至有剩餘頻寬時，才能載入收看畫面，建議觀眾可於不同時段或不同電子裝置收看港視。

港視這個做法很易塞車，以早上時段為例，大多數人7點零8點出門口，見有新嘢宣傳得咁勁，搭車時一齊點入去睇睇，初時好易過40萬，但一過額就要等，下次就唔嚟。正常嚟講，除非節目超吸引，否則初時有40萬客，最後留到10萬客都唔錯。即係你想有40萬客，初時容量最好有160萬。還要注意睇廣播電視一部電視機可以有兩三個人睇，但手機板腦睇只得1個人睇，得10萬客就只有10萬人睇，以6萬幾人一個收視點，若然只有10萬人睇，2個點都唔夠，唔可以同無線過百萬的收視去爭。只有1、20萬人睇的話，同蘋果動新聞的瀏覧量差不多，只是同蘋果爭。

呢個世界乜都講錢，魔童唔敢提供同時過100萬的容量，顯示佢自己都相當窒步喎。