立法會凌晨受到衝擊，政壇再起風雲，學聯批評帶頭衝擊者，事後四散、不負責任；泛民強烈譴責，強調衝擊與佔領行動無關，有必要劃清界線。
建制派議員就認為，有份協助佔領的政黨要即刻宣布停止佔領，而唔係意圖開脱責任，仲去信曾主席，要求申請禁制令，結束佔領。曾主席一方面譴責暴力行為，同時相信衝擊立法會人士與佔領留守者不同。
睇完政壇各人表態，Ariel就覺得曾主席講番昨日發生的事，都可以見到現時局面都真係幾有意思，有啲行動的決定，背後都唔想碰到政治敏感區。
有意見批評立法會外警察人少兼增緩慢，暗示政府縱容衝擊。查實
昨晚早至十點幾已經有人圍立法會，警察並沒出現，曾主席話當時接到的訊息係，示威者無幾耐就離開，所以立法會有通知警方，但覺得唔需要協助。
到凌晨一點，發生衝擊事件，警方本來可以直接由添美道入去立法會幾分鐘就到，但就要先經過留守者的帳幕，立法會方面考慮如果突然咁多警員出現喺佔領範圍，會引起佔領人士好敏感的反應，所以警察增援時，係繞道添馬公園，用咗十幾分鐘。曾主席承認，因為外圍的佔領，對警方及時處理暴力衝擊構成障礙。
敏感時期，樣樣考慮足到，咁到底差人算唔算遲咗增援呢？
Ariel
** 博客文章文責自負,不代表本公司立場 **
籌備多年，一波多折的香港電視，終於正式「開台」，主席王維基話至下午1時有25萬用戶睇過港視的節目，如果以電視台的每點6萬幾收視，應該有4點，開台日收視好過亞記以倍數計喎。
另外維基又透露已有33萬部智能電視，可睇港視直播，有67萬部裝置，下載他們的應用程式，兩者加上合共是100萬。出席開台禮的政府官員商務及經濟發展局局長蘇錦樑都幾高興吓，仲透露在67萬下載，佢佔咗5個，包括在兩部手機、兩部平板電腦和屋企的智能電視。佢咁講唔知攞景定贈慶，咪即係話港視67萬唔係全部都係不同用戶囉，廣告商落廣告時，條數會點計呢？
維基在開台禮上，繼續行感性路線，話無論幾黑暗，總有辦法走過去，又延續不獲免費牌照時的悲情牌，重申阻撓港視發牌只有一個人，矛頭似又指向番CY噃，繼續咁打悲情牌真係咁有效？
維基開台，當然係益咗廣大網民同電視觀眾啦，不過Ariel搵業內資深人士傾傾，計吓條數，港視前路真係唔易行。港視每日播六小時新節目，周一至周五都有自拍劇，即使每日播一集，一年就要有265集的自拍劇先夠，一集的製作費，維基話要成100萬，咁一年淨係劇集製作費用都要成2億6千幾萬喎，加埋外購劇同其他支援費用，燈油火爉，一年睇怕都要4億開支才落到樓。
計完開支，就睇點收番成本啦，依家在香港的廣告界眼中，網媒仍然係小眾，TVB將所有劇集放上網，加埋新聞頻道等等，網上一年收益1億港元。強如TVB都只係得1億，港視似乎短期內攞到億元計的網上廣告收入唔係咁易喎。
據知情人士話，維基都有諗過最理想賣埠可以頂到開支，收到廣告就賺，所謂賣埠點計？三分一收入來自東南亞賣片，三分一來自內地賣片，另外三分之就係靠劇集喺內地播谷紅自己的星，在內地拍廣告等，港視抽佣都幾和味。不過，依家維基同阿爺的關係，唔好話劇集在內地播出的希望不太，連帶啲星喺內地發展都會受影響。
港視條路唔易行，希望維基發揮佢靈活的頭腦，快快為港視搵到超前的發展路向，等觀眾欣賞多啲好節目啦。
