警察「男神」現身政府FB

佔中佔咗咁耐，正反雙方都大力利用網絡打仗，日後都可以成為研究網絡傳播的一個案例。

 

政府在網絡社交媒體一向俾人處於弱勢的感覺，似乎都想搞搞新意思，Ariel今早上FB，發現宣傳政府新聞同消息的政府新聞網，原來靜靜雞開咗FB專頁，仲唔聲唔聲開咗一排，每日平均都有5至6個貼文，有啲係「硬」嘢，包括政府聲明等，有啲就係軟性內容，做晒P圖。

 

今日八點仲貼咗條片，警隊「男神」現身。即係那位借水俾示威者飲而在網絡爆紅的任SIR，係比較感性的內容，講番點睇自己成網絡紅人，有一點幾特別，「男神」仲透露咗自己的細佬比較支持示威者。在政府搞的社交媒體上出現呢啲講法，都算好罕有吓。成條片長兩分半，任SIR以幾個人身份去講番對佔中的睇法，呢種表達形式，在政府嚟講，都算走得好前，都有可能出現唔同睇法。條片都上載埋YouTube。

圖片來源：政府新聞網FB專頁

據聞新聞處都預咗呢個FB會出現各類留言，引起不同意見的議論，新聞處預咗呢條數都照去馬，睇嚟政府都想在網絡同社交媒體呢個平台上，有番啲自己的聲音喎。

Ariel

** 博客文章文責自負,不代表本公司立場 **

佔領行動激化，泛民不想找數，一直尋求退場方法，但講來講去也講不出一個結果。

早前有泛民中人提議，不如在金鐘搞一個10萬人大集會，然後宣布運動勝利完成，可以退場。不過搞集會有人同意，話宣布退場就無人願意講，建議無疾而終。

法院批出金鐘和旺角的禁制令，泛民應該有個態度。昨日泛民議員飯盒會就傾到旺角佔領區可能在下周清場，可否發聲明叫旺角佔領者離開旺角後返回金鐘，不要再遷移到其他地區擴大佔領。但有公民黨及工黨成員反對不能擴大佔領，最後發聲明一事只能作罷。

泛民中人慨嘆，佔領事件鬧得太耐，又有人有意搞激化，民意開始反轉。學生在佔領之後，拍拍屁股就走，泛民要參與明年區選和後年立法會選舉，明知自己要找數，但偏偏無人願意出來做醜人，唔止唔敢叫人撤，連叫人唔好擴大佔領都唔敢講，咁少事都無共識，真是眼白白睇住自己中槍，無計可想。

ARIEL覺得，泛民也好，學聯學民也好，日日有人出來講嘢，但無一個領袖，結果就好似一班盲頭烏蝿咁，唔係領導運動，係被運動帶著行，真係無眼睇咯。