政事
立法會繼續辯論由工黨何秀蘭提出，運用權力及特權條例，調查特首CY持有 DTZ Japan 股權，議案最後被大會否決。唔知係咪議員覺得政治新聞悶悶哋，建制同泛民議員針鋒相對時，俾啲笑料大家。
話說工聯會王國興質疑工黨是收取外國錢，才多次提出引用特權法，想推倒CY政府，發言時更舉起「泛民收錢實錄」本書，動議的何秀蘭要求佢不要展示，王國興就爆咗句：「唔知係心虛…驚到屎淋尿瀨」。
何秀蘭向曾主席提出反對，指其用詞不雅，曾主席就話王國興表達意見時，可以用更文雅的講法，王國興就解釋呢個係：「『史林廖賴』是專有名詞，亦都係依家無綫電視晚晚《愛‧回家》劇集內，係有一個律師行的名嚟嘅。」
套劇的律師行真係改咗咁名，證明王國興有做功課。
圖片來源：蔣家旻微博
王國興再俾曾主席叫停，指不應以電視劇用字作為標準，王國興都仲係堅持呢個詞形容何秀蘭貼切，之後就繼續發言。
議會外，反對同支持政府兩個陣營撕裂晒，議會內兩派都會愈來愈擺明車馬打大交，夾在中間做裁決的曾主席，今個會期可能仲忙啦。
Ariel
** 博客文章文責自負,不代表本公司立場 **
下星期二係11月最後一次行政會議(11月25日)，傳聞行會將在此次會期中，考慮電視續牌的問題，特別係亞視續牌的問題，如果亞視在下周二前未搵到新買家，睇嚟佢的牌照都凍過水啦。
無綫同亞視的牌到明年11月底到期，按規定如果不獲續牌，政府要提前一年通知，即係話如果下周二行會有決定，亞視不獲續牌的話，佢就可以按原來牌照的期限，經營到2015年11月30日。為了遵守呢個一年通知的規定，行會可以將啲牌照延期，例如行會12月30日先決定唔續牌俾亞視，亞視就可以經營到2015年12月30日啦。但係既然牌照期限已到，行會拖住唔決定，雖然有規定可以依啫，但喺目前的政治氣氛，政府係咪願意為保留亞視個牌，再被人多粒彈藥去攻擊呢？
亞視近年都搞得幾差吓，好多節目收視得個一、兩點，如果行會下周開會，講到通訊局的建議，憑常理通訊局係唔會建議俾亞視續牌，亞視唯一的救命草係在行討論前，有新買家提出收購入場，行會可以因為呢個理由暫緩作出決定，然後等新買家提出新建議後，交通訊局再研究。
聞說亞視賣盤一直唔成功，主要投資者王征始終吊高嚟賣，唔肯減價，仲有個傳聞佢說寧願清盤都唔降價，做生意做到佢咁有原則，都可以話係一個奇葩。
雖然世界的事情可以一、兩日內有轉變，但亞視的生命都似係在倒數之中，未來幾日相當關鍵，如果王征的目標只係壓到最後一、兩天，攞到最高的價錢就成交，亞視仲有一個生機，如果王征真係寧願清盤都唔降價，亞視都好大機會不獲續牌啦。
