政事
日日去金鐘佔領區的壹傳媒集團主席黎智英又有動作，繼連日接受CNN等外國傳媒訪問叫佔領者撤退之後，又在旗下報章及雜誌寫文章，題為《敢走漫長的路》，話雨傘運動陷入僵局，促請學聯、學民思潮及佔中三子帶領暫時撤退，保留實力，必要時捲土重來。
肥佬黎又指學聯秘書長周永康、副秘書長岑敖暉及學民思潮召集人黃之鋒三名學生，應該勇於承擔歷史責任，帶領大家走上漫長的路咁話。
肥佬黎呼籲撤退的立場相當清楚，但令人費解的是他既然不支持佔領，為何日日去金鐘佔領區坐，即使想顯示和學生共同進退，都唔使落力得咁交關啩?
有法律界人士向Ariel分析，肥佬黎的部署好高。佔中近尾聲，好似肥佬黎這類頭面人物，自然怕事後被檢控，佢而家日日去金鐘坐，上晒國際媒體，將來若然被起訴，自然可指為政治逼害，外國亦大條道理介入聲援。
但肥佬黎去金鐘坐加上他旗下媒體的態度，也可能被告協助或教唆非法集會，但如今他日日叫人撤退，仲怕外國傳媒寫得唔夠仔細，在自己旗下雜誌白紙黑字登寫多一次。你告教唆非法集會，佢話我係教唆人撤退唔好集會喎! 你話肥佬黎呢一著高唔高呢?
Ariel
** 博客文章文責自負,不代表本公司立場 **
昨日清理亞皆老街路障後，警員與示威者由傍晚開始爆發多輪衝突，引起唔少人關心今日清理彌敦道路障時，會唔會順利。
昨日拖到中午先開始清理障礙物，搞到傍晚先通到車，結果佔領人士同警方在砵蘭街「開戰」。唔知係唔係汲取咗昨日拖得太長的經驗，今日警方好早就介入清理工作。初時陸路交通運輸業大聯盟成員組成的代理人團隊九點半開始清理障礙物，無幾耐同佔領人士發生對罵，執達主任就要求警方介入，十點鬆啲，警方就開始行動，一批「專業移除隊」出動。
呢批專業移除隊，即係著藍色衫，戴晒頭盔，又配備咗眼罩，佢哋個個手瓜起展，出手好快，一路向油麻地方向推進，一路有廣播要求聚集人士離開。
到咗十一點再發生衝突，警方帶走多人，之後移除隊一路向前推進就比較順利，到中午已將禁制令範圍內的13個路障全部移除，下午一點幾彌敦道陸續恢復通車，下午三時多，彌敦道南北行三線全部開通。
據聞呢批專業移除隊，大部分來自機部隊PTU，Ariel今日睇電視，覺得佢哋唔屬後生，八咗一吓，話當中唔少係PTU教官，平時操到好FIT，而且幾有經驗，平時素有訓練，以前抬人的場面都係由佢哋參與，聽聞佢哋連按穴位都識，有需要時以最有效的手法抬走示威者。佢哋推進時幾強硬吓，一有阻礙，就將人帶走，交由隨後的警員處理，所以推展得好快。
今次警方清障同上次最唔同，係即場拉人，預備咗旅遊巴，一遇阻礙就抬走，一路強硬清出馬路，所以清場清得較有效率。
