佔中佔咗超過60日，想當日好多港人被學生為理想走上街頭而感動，各方支援物資源源不絕來，要將物資分配好，管好數以千、甚至萬計的人在佔領區生活作息，除咗本身佔領人士的質素，都要有強而有力的管理。
聽聞其中有一批特別的義工，來自演藝界，佢哋分配好物資，管理好佔領區，原來同佢哋專長好有關係。話說拍戲、拍劇，一大班工作人員，由副導、助導、場記、木工，每每去到陌生地工作，點樣做好物流，令拍攝工作最有效率進行十分重要，因此在分配處理物資方面，佢哋好拿手。
在佔中開始時，呢批演藝人士好投入，協助學生分配物資、管理佔領區，發揮自己專長，佔領區井井有條，佢哋都居功不少，據了解高峰期有成300人咁多，可能演藝界人士特別感性啲，見到佔領區的和平，大多數人又自律，確實有啲似理想國度，呢種支持學生的情緒都係娛樂圈中流傳，亦解釋了為何佔領之初有不少明星支持佔中。
隨著運動進入膠著狀態，學生方面希望呢班咁幫得手的義工繼續支持，仲負責埋糾察工作。但佔咗咁耐，佢哋亦都好想知運動走向，問學生有冇打算幾時撤退，學生話冇諗過，亦冇打算退場喎。呢班演藝界義工，都有生活壓力，另一方面可能亦感到咁搞落去，唔知點收科，於是大部分後來都撤走咗。
運動好似失方向，理想與現實，都真係有好大距離。
Ariel
** 博客文章文責自負,不代表本公司立場 **
