政事
維基的港視在網上面世，係威係勢，雖然頭一個星期的總體收視未達維基最高目標，但在網上引起唔少關注，做媒體要講求熱度，多人討論都算先聲奪人。
一向大膽創新的維基，言論都幾出位，有時引發的討論未必單單都係正面，今日佢在報章專欄又是一例。佢講到前晚睇到旺角的衝突情況，瞓得唔好，有同事覺得警察好狠心，似食咗藥。維基原文寫到：「現在才明白，也許當年日軍連日廝殺，看見自己同僚的死傷慘重，才失去理智進行大屠殺發洩。」佢跟住話警察對市民的片段廣泛流傳，事實就係事實，經過旺角的情況，好難想像金鐘日後會點，叫學生要小心保重。
呢篇文在網上引起好多討論，尤其有關日軍一段的內容，有批評警察連日用咗過份暴力的人都撐維基，但係亦有唔少人覺得佢唔應該攞日軍同香港警察比，有啲網上留言都幾激，用埋「食屎狗」呢啲形容詞。
今時今日，寫篇文抒發吓睇法，都引起咁多爭議，唔知佢寫時有冇諗過會咁大迴響呢？
王維基文章原文連結：
Ariel
** 博客文章文責自負,不代表本公司立場 **
警方呢次在MK清場，雖然都惹起唔少爭議，被示威者指用過多暴力，但整體來說，頭幾日的部署尚算成功，無出大亂子，局面都受到控制。但今晚踏入周末，預計示威的人流又會大量增加，能唔能夠守得位旺角清場後的局面，就要睇呢幾日啦。
呢次差人在旺角的清場部署得比較週密，早幾個星期先通報俾阿爺聽，旺角有幾個幫會人物喺度聚集，請阿爺幫手，結果阿爺發功，在深圳拉咗兩個香港黑社會的坐館，令到在旺角聚集的黑人物似乎收歛咗。
清場的日子都揀過，第一日出手選在星期二，星期二清亞皆老街場後，當晚固然係示威人士湧番出來的高峰，睇第一晚在西洋菜南街等後街有「巷戰」，但經過周三晚打多一場，再到昨晚大家都有點疲，過咗一點後就收工啦。
警方估計激進的示威者有2000人，拉都拉咗百幾啦，而拉咗後通常都有個禁令，佢哋唔可以踏足旺角，最激那班人出唔番嚟。另外，千幾人已經玩咗兩、三晚，一定程度係削弱咗日後出來的力量。
但周五晚開始放假前夕，又係示威人流另一個高峰，相信差人都唔會掉以輕心，會大量加派人手落旺角，目標都係守住呢個周末，唔俾示威者重佔馬路，如果穩得住呢個周未，在政府的角度，旺角都可以話係「光復」咗。
