學民思潮黃之鋒及另外兩名女成員黃子悅及盧彥慧日前宣佈絕食，昨天已在網上流傳一張兩個學民女食粥照。有朋友問Ariel做也唔出，Ariel覺得有啲疑點。
首先係無理由啱啱絕食咁快就走去食粥。第二係照片中兩女頭戴絕食白色頭帶，但昨日未見過學民絕食三子帶白色頭帶。第三係照片中有個人似周澄，而周澄早已唔玩無理由出現。結論係張相唔似真，唔登得。
結果周澄真係出嚟澄清，她在Facebook上話，網上流傳那張相是她和葉楚茵在09年六四前夕參與絕食的圖片，當年學聯同學發起64小時絕食靜坐，至於圖中的粥水，是絕食結束時義工為一眾絕食同學買來的。周澄話本來覺得澄清很無謂，但知道舊圖被用來當成抹黑學生的宣傳，不得不嚴正回應。
在這場運動中，網上真係流傳好多假嘢，就如9.28之後，Ariel也看過所謂警察開槍的相，後來也證明係假嘢。或許今次做「學民女食粥」之人，會覺得對家都有做，唔做番佢就笨。但這個世界萬事離不開一個理字，總之做假嘢就唔好啦。
Ariel
** 博客文章文責自負,不代表本公司立場 **
英國國會下議院就中方拒絕發簽證給外交事務委員會成員來港，舉行緊急會議。委員會主席Richard Ottaway稱，上周有中方官員向他表示，中英聯合聲明有效期至香港九七回歸，現時已失效。
中國駐英大使劉曉明等官員，上周曾和外交事務委員成員見面，估計這是委員會見面後的印象，但未見中方官員有此公開表態。中國就外交事務委員會赴港調查一事態度強硬，相信當日會面都係由頭嗌交嗌到尾，嗌交時雙方觀點係唔係講得咁清，就真係好難講。
Ariel問過了解聯合聲明同基本法起草的知情人士，佢就話按道理聯合聲明不存在失效的問題，中英聯合聲明是中國同英國之間的協議，好似一份合約咁，大家同意97之後，香港回歸中國，而中國就以基本法落實聯合聲明的內容，既然係一份合約，就不存在失效的問題，因為即使在過咗1997年，中英聯絡小組都繼續運作到2000年，唔應話中英聯合聲明到1997年就失效。
佢又話雙方爭議的焦點應該係，英國有冇權監督中國執行基本法、特別係特首如何普選產生。由於中英聯合聲明的重要精神寫入咗基本法內，英方就會覺得有權去監督，但中方就會覺得，基本法雖然落實聯合聲明的精神，但具體執行係中國的內政，不由英國去監督。所以真正爭議唔係聯合聲明有無效，而係英國國會有冇權派代表團來香港監督中國、特別係監督香港2017年如何普選特首。
聯合聲明附件一中講到中國對港政策：「香港特別行政區行政長官在當地通過選舉或協商產生。」聯合聲講明行政長官可以選舉或協商產生，既然協商都得，咁香港2017年如何舉行普選，英國當然係無權過問啦。
睇嚟呢次中英爭議的口水戰，仲會拗一陣，不過，各方都好懷疑英國政府依家同中國的經貿關係咁密切，係咪會好認真同中國過唔去。
