義務律師起爭議

隨著佔中走向尾聲，唔止自首的65個，警方拘捕的示威者數以百計。網上流留傳一些差人留言，話周一零晨5点鐘拉咗20幾個小朋友返警署，小朋友打电話俾所謂佔中義務律師，怎知個律師唔接電話，班小朋友始知驚，對住阿Sir不停講對唔住，求阿Sir放過他們，而且乖乖的坐定定喺度，企定定喺度。

其實佔中義律師幫唔幫示威者辯護，在上次衝立法會後已起爭議。當時「和平佔中」發聲明「強烈譴責暴力衝擊行為」，更表明「如果是暴力衝擊，一般情況下，法律支援組不會予以協助。」有報道指金鐘的義務律師向衝擊立法會的示威者說：「你地班人，咪抗拒組織，又想拆大台？有事就想打被捕支援熱線，世事有無咁便宜呀?」

其後鄭大班就此事在D100的節目上質詢義務律師團的陳淑莊，陳淑莊亦講明義務律師係有選擇，係個人選擇，講明非暴力，暴力就唔做。大班就非常慶，話佢地當日話俾人聽佔中有義務律師團，而家又要揀，係假仁假義，不可以接受，行公義，唔可以揀人。陳淑莊話係義務，斗零無收。大班就話斗零無收大晒呀? 點可以話義務大晒，有選擇性，同梁振英有乜分別?

大班質疑佔中律師團唔夠人可以講明盡量做，佢知道律師團走咗好多人，買少見少。陳淑莊話「已經做到死」，大班認為，唔係話做到死就得。

Ariel都覺得呢個所謂佔中義務律師團，真係害死人。讓參加者有一個印象，點搞都有律師幫自己打官司，咁就唔怕去衝。周一佔龍和道，有中學生參加，佢地都係聽大台講去衝，俾警察拉咗，咁樣即係無義務律師呀？若然佔中義務律師團唔打算幫手，見到學聯學民講咗幾日叫人帶口罩眼罩去集會，就應該在集會前發個聲明，叫示威者小心，佢地一用暴力衝擊就唔會有義務律師幫手。

究竟真相係唔係佔中跌晒watt，大家都要搵食，義務律師四散，根本無幾多個律師可以繼續提供免費服務？戴耀廷話佔中運動搞咗幾日就被雨傘運動取代咗，好似佔中運動早早已不存在，其實佔中的義務律師團，係唔係都一樣早早已經不存在呢？

Ariel

** 博客文章文責自負,不代表本公司立場 **

佔中三子、陳日君，連同數十名市民到中區警署自首，承認非法集會罪。民主黨有多達14人自首，包括立法會議員胡志偉、副主席蔡耀昌、前立法會議員張文光、楊森、屯門區議員陳樹英、西貢區議員林咏然等。

公民黨陳淑莊有到場，話係律師團協助自首人士。政治八卦友話，公民黨和學民思潮關係密切，學民根本是運動指揮，但運動一散，公民黨唔見頭面人物自首，反而民主黨還有14人自首。

公民黨黨魁梁家傑昨日拒絕自首，但表示尊重佔中三子自首的決定，佢話公民黨暫不會跟隨自首，亦不會離開雨傘運動，直至知道運動何去何從為止，他仲話泛民大部分成員亦有相同立場。

「佔中十子」之一的錢志健亦話，未是時候自首，又說佔中金融組當中大部分人未準備好。被問到作為佔中的中堅份子，佔中三子已自首，是否亦應跟隨，他說不同的時機，做不同的事，佔中金融組中有很多人都是監管機構的人，所以會有不同的憂慮云云。

隨著運動走向尾聲，當日話公民抗命後齊齊自首的初衷，開始有好多人忘記啦。