佔中後記最後篇

追咗一排的阿娟佔中日記同佔中後記，化名阿娟的作者昨日再出動，並且話係最後一篇，決定收筆啦。

阿娟外傳 佔中後記 第7篇 （2014年12月6日）

（*阿娟學聯佔中核心義工，已於十月下旬撤離金鐘佔領區）

佔領中環到咗今時今日，落到咁嘅田地，可以用八個字形容：一盆散沙，分崩離析。作爲過來人，並唔覺得意外，只不過之前敢想都唔敢講罷了。佔中三子自首就係預咗，搶住絕食係黃之鋒，亦估得到，爲此搞到學聯同佢地幾乎反面，亦係遲早既事。Alex都忍咗佢好耐。不過，勢估唔到上星期日雙學突然話‘包圍政總’，聽電台社聯總裁蔡海偉講得非常之啱：唔明（雙學）點解要咁做，亦唔明點解認爲自己有能力咁做。

仲有一樣估唔到嘅係，皇阿媽Grace NG唔勸個仔顧住健康，反而掉翻轉頭幫口寫信俾梁振英，就好詫異，我唔會覺得佢好偉大。唔知天下父母心，有幾多個好似佢咁。

哦，順便講一下，大家睇到Joshua同佢阿媽啲文稿聲明之類，都係由專人寫手代筆，要求就係有幾感性就幾感性，實行製造‘催淚彈’。記唔記得我以前講過，Alex成日彈阿瘋連書寫都有障礙，唔係仲要笑人，拒邊有咁好文采？啲稿係記者寫既，黎智英呢方面一路有指定人幫手。

睇番成個佔領中環陣勢，先係佔中三子先走頭，後自首；然後係泛民議員返立法會‘不合作運動’，剩低係雙學，如今，不但雙學拆檔，聽學聯中人講，Alex同Lester已將被‘遺棄’，唔怪得接連幾日金鐘佔領區都唔見佢兩個蹤影。根據學聯中人話，Alex同Lester始終係靠搞激玩曝光，所以有包圍政總一役，當初原意係想搏拉，但係到時候又縮係地鐵站頂，叫做遙控指揮咁講，又點樣可以俾警察拉到？大家對Alex不滿，開始表面化，有人當面話佢‘又要威，又要戴頭盔’。學聯中最新消息，未來可能輪到Yvonne（梁麗幗）出面，‘後面既人’認爲佢係女仔，同時比較溫和，無乜殺氣，信不信由你，遲幾天邊個出來宣佈撤離或堅守，到時候就見分曉。

兩個星期前發生一件人間慘劇，一位CityU嘅姓劉女校友，而且係同我同一系既，專登返校園跳樓身亡。事件令人感慨良多。慘劇肯定同佔領中環無關，報紙話係個人就業原因，不過，我都被學聯周邊啲人問起，仲有在金鐘認識嘅記者。

有好心網友問：‘是否越爆越多，遲早會被人認出我係邊個？’見到記者再次出現在面前，心頭不由得緊一緊。雖然我並非存心爆料去出氣或者整蠱人，只不過想告知公衆，佔領中環内里嘅實情，也算是對香港呢一筆歷史留低啲足跡記錄，但始終都開始會擔心個人處境。大家講得岩，係時候收筆了。

佔領中環，延續兩個幾月，各方各派究竟得到什麽，失去什麽？令人唏噓無限，感慨不已。相信每個香港人都受傷，包括‘鳩嗚團’啲人，佢地連基本人格都失去埋，以後點在香港立足，同其他人相處？咁Alex，仲有黃之鋒等人，何嘗唔係咁。我都傷，不過相對係輕傷而已。

聖誕節就到，願我地大家一起為香港祝福！江湖再見了，各位！

Mark Felt

** 博客文章文責自負,不代表本公司立場 **

最近有網有留言，話追開阿娟佔中日記同阿娟佔中後記，但其中的佔中後記唔記第4同第5篇，就跳咗去第6篇，真係唔好意思，即刻補番：

阿娟外傳 佔中後記　第 4 篇(2014年11月13日）

（*阿娟 學聯佔中核心義工，已於十月下旬撤離金鐘佔領區）

清場莫非係解脫 ？

全城人人講清場，我幾日前忍唔住重回金鐘佔領區行咗一轉，發現真係面目全非。一方面係學生越來越少，探下個朋友都冇咁容易搵到，人數唔算少好多，不過生面孔好多，而且睇落都非純情學生族類；另方面係見到‘領袖們’，大家say 個Hi算啦，不過人人都無復當日英雄氣，口講緊上京，心中念頭係清場。

佔領區内，學生(包括大中學生) 越來越少，道理好簡單，考試季節到了。學聯領袖都尚且唔係個個有得緩學，大部分都要起碼交一篇論文頂檔，其他更不在話下。Tommy（張秀賢）就4科drop 咗三科，申請唔考試，所以呢幾日現場係Tommy 揸莊主持。 其他如黃之鋒入學無耐，但就日日唔上堂唔交功課，Joshua 本人同家長係覺得自己好偉大犧牲，抑或好尷尬失落，唔知，我只係知道目前他已經係三科‘肥佬’，日後點算，亦唔知，估計學校唔敢郁他卦。

聽現場朋友講，學聯幾個（真係得番幾個！）而家最擔心金鐘呢度溝下溝下，變咗陌生人同獨行俠世界，學生變咗少數，分分鐘只剩底幾個領袖。甘樣好危險，領袖無人跟隨，‘群衆’又當你透明，仲要係帶定晒架生個款。一旦清場，唉！無眼睇！領袖們重講緊上京，其實好似一塊塊大石掟落去，希望有D浪花，結果次次都石沉大海。唔係好明，上京同清場，好矛盾。因爲現場所見，大家都已經開始收拾細軟。學聯呢一刻已經議決唔會自動離場，但就好‘盼望’政府清場。清場，又好似係一種解脫。

返入海富，外面冷風陣陣，回首佔領區悲涼肅殺，想下自己望下人地，百般滋味在心頭。

今日睇咗王文華的《人生勝利組》。好感慨：我地呢一代被灌輸‘許勝不許敗’的所謂‘一往無前’精神，以爲人生必定要入勝利組，結果搞到要學習失敗，其實好可悲。我今次參加佔中，總算學咗一次失敗。人生可能豐滿D，唔使成世做阿Q。 唔知道Alex 他們會唔會醒？ 抑或從此一生入咗條隧道，永無掉頭機會。

阿娟外傳 佔中後記第5篇（2014年11月19日）

 （*阿娟學聯佔中核心義工，已於十月下旬撤離金鐘佔領區）

未輪到清場，先有上京一幕，一如我之前講過，Alex佢地一心只係想住吸引傳媒做騷，肯定預咗上唔到京，分別只係到得北京，時間長啲，影響大啲，報道多啲，想唔到變左‘赤鱲角半日游（網友話嘅）。似乎北京刻意將可以做秀的時間機會，減到咗最小。

話學聯上京有兩條隊，一明一暗，我去學聯八過，係真事，‘暗’個隊係邊幾個？名單如下：方志信，丁嘉祺同埋葉詠琳。呢幾個我都識，揀佢地係有原因：一則學聯内部算信得過，二則好緊要，佢幾個普通話比較掂。

星期一聽電台訪問Alex，仲有羅冠聰，主持人問：學聯乜嘢招式都已經出晒，跟住又會點？Alex講左句真心話：睇下有乜好做。真心話嘅意思係，佢地真係從來無什麽長遠大計同基本策略，正一係餐搵餐食，總之慌死被人遺忘就是了。

正因爲如此，例如上京呢啲機會，唔可以隨便益人，例如黃之鋒。最近有機會見到學聯核心成員之一，話過我聽，Alex在會議上講到明，上京嘅事，絕對唔可以受埋Joshua玩。Alex原話係：阿瘋癲㗎（佢真係用呢個字）無腦，無性，無本事，連寫嘢都有障礙，淨係識搶嘢，借佔中搶風頭；如果無表現，美國佬應承佢家長個份獎學金，就會無行。

難怪正當上京消息上晒頭條時，黃之鋒就果然不甘寂寞，主動出來講如果清場，自己願意去接受刑責。正所謂人講佢又講。佔中三子咁講，何俊仁咁講，學聯Alex又跟住咁講，一時好似坐監都要爭住坐咁。

開始有建制派講，話我地啲人同泛民成日聲稱願負刑責，係曲解法治。拿，我讀LAW嘅，又曾經參加過佔中，正因爲係過來人，所以對人家講到‘法治’兩個字會特別留神。我地唔好因人廢言，確係有個好緊要既法治原則：就係唔可以話自己願意負刑責，於是就大條道理犯法。願意負刑責係當事人既moral judgment，犯法係他人同社會受害，當事人可以選擇受刑，但社會同他人無得選擇唔受害，加上成日囉來做宣傳，會直接變成鼓勵犯法，並且威脅所有人有法都等於無法–我願意受刑，是否就等於我可以殺人全家？乜嘢叫‘可以’？法治就係話有啲野‘唔可以’，而且要阻止，禁止，而家啲講法變咗係開禁。坦白講，呢個先至係我選擇退出既最主要原因。9月27日，睇到金鐘現場環境，我已經同‘他’講，一開波已經無晒底綫啦噃。

至於黃之鋒係唔係‘好恨坐監’，呢度暫且先唔講住，學聯領袖們玩針對，絕不稀奇，學聯本身自己内部，又何嘗唔係如此？學聯學聯，顧名思義係各大學學生會既聯會，領袖又有幾多集思廣益，實行民主？究竟邊間U出力最多，邊間啲人最幫手？先旨聲明：我本人唔係出身港大，係CityU。留番下篇講啦！